هاوپەیمانی نەسر سەركۆنەی هەر هێرشێك بۆ سەر بارەگا حزبی و گشتییەكان دەكات و داوای یەكڕیزیی نیشتمانی دەكات.
ئاوێنه: لە ڕاگەیەندراوێكدا، هاوپەیمانی نەسری حەیدەر عەبادی، سەرۆك وەزیرانی پێشووتری عێراق ڕایگەیاندووە، بە هەموو جۆرێك دەستدرێژی بۆ سەر بارەگا و ماڵ و موڵكە گشتییەكان ڕەت دەكاتەوە بەتایبەت لە بەغدادی پایتەخت، ڕەتیشی دەكاتەوە پەنا بۆ سوتاندنی ئاڵا ببرێت، داوا لە حكومەتی عێراقیش دەكات، پارێزگاری لە ئاسایش و باڵادەستی دەوڵەت بكات.
نەسر ئاماژەی بەوەشكردووە، "پێشمەرگە و حەشدی شەعبی شانبەشانی یەكتر دژ بە تیرۆریستان جەنگاون، بۆیە دروستكردنی دوژمنایەتی لەنێوانیاندا حەكیمانە نییە".
سەرلەبەیانی ئەمڕۆ شەممە خۆپیشاندەران بەوتنەوەی دروشمی پشتیوانی بۆ حەشدی شەعبی و ئیدانەكردنی لێدوانەكانی هۆشیار زێباری، دوای ئەوەی توانیان بچنە نێوی، ئاگریان لە بارەگاكەی پارتی بەردا و هەروەها ئاڵای حزبەكەیان لەسەر بارەگاكە داگرت و ئاڵای حەشدی شەعبیان لەجێی هەڵكردو هەروەها بەشێك لە خۆپیشاندەران ئاڵای كوردستانیان لەبەردەم بارەگاكە لە ژێر پێداناو بەشێكیشیان ئاگریان تێبەردا.