پاش ٩ ساڵ یەكێك لە تۆمەتبارە سەرەکییەكانی كەیسی هێرشكردنە سەر ئاسۆس هەردی بەڕاگیراوی دەهێنرێتە بەردەم دادگا
  2020-10-19       1890       

پارێزەری دۆسیەی هێرشکردنە سەر ئاسۆس هەردی رایگەیاند "پاش تێپەڕینی ٩ ساڵ بەسەر هێرشکردنە سەر ئاسۆس هەردی‌و ١٥ دانیشتنی دادگای دادبینی سەبارەت بەو كەیسە، ئەمڕۆ بۆ یەکەمجار یەكێك لە تۆمەتبارە سەرەکییەكانی كەیسی هێرشكردنە سەر ئاسۆس هەردی بەراگیراوی هێنرایە بەردەم دادگا، کە ئەفسەرێکی پلە باڵای هێزەكانی (70)یە".



ئاوێنە: کارزان فازڵ، پارێزەری دۆسیەی هێرشکردنە سەر ئاسۆس هەردی بەئاوێنەی راگەیاند "ئەمڕۆ دوشەمە ١٩ / ١٠ /٢٠٢٠، بۆ یەکەمجار یەكێك لە تۆمەتبارە سەرەکییەكانی کەیسی هێرشکردنە سەر ئاسۆس هەردی (ر.م) بەدەستگیراوی ئامادەی بەردەم دادگا کرا، لەبەرئەوەی لەلایەن ئاسایشەوە لەسەر کەیسێکی تر راگیراوە".



ئەم تۆمەتبارە سەرەکییەی دۆسیەی هێرشکردنە سەر ئاسۆس هەردی، کە ئەفسەرێکی پلە باڵای هێزەكانی (70)یە، پێشتر دادگای تاوانەكانی سلێمانی 3، چەندین جار بەنوسراو داوای لەوەزارەتی پێشمەرگە/ هێزەكانی (70)ی كرد بو پسوڵەی ئاگاداركردنەوەی بدرێتێ بۆ ئەوەی تەبلیغ بكرێت كە رۆژی دادبینی لەبەردەم دادگاكەیان ئامادە بێت، بەڵام ١٥ دانیشتنی دادگا کراو ئەم تۆمەتبارە ئامادە نەدەبو، تا بەهۆی کەیسێکی ترەوە دەستگیر کراوەو دادوەر بڕیاری دا بەدەسگیرکراوی بهێنرێتە بەردەم دادگا.


لە"دۆسیەی هێرشکردنە سەر ئاسۆس هەردی"دا، سێ تۆمەتبار هەن، یەکێکیان کە شۆفێری ئۆتومبێلی هێرشکارەکانە حوکم دراوەو تۆمەتباری سەرەکی نییە، دووەمیشیان (ر.م) کە تۆمەتباری سەرەکییەو ئەمڕۆ بەدەستگیراوی هێنرایە بەردەم دادگا، تۆمەتباری سێهەمیش (ێ‌.م) کە پێشمەرگەی سەر بەهێزەکانی (70)یە، لەلایەن دادگاوە فەرمانی دەستگیركردنی بۆ دەرچوەو تا ئێستا دەستگیر نەكراوەو تۆمەتبارێكی سەرەكی هەڵهاتوە.


کارزان وتی "دانیشتنی ئەمرٶ تایبەت کرا بە یەكێك لە تۆمەتبارە سەرەکیەکان و رێوشوێنی دادگایی کردنەکە دەستیپێکرد، بەڵام لەبەرئەوەی پارێزەری تۆمەتبار ئامادە نەبوو، دۆسیەی دادگایی کردنەکە دواخرا بۆ ٢٧ / ١٠ /٢٠٢٠".


زۆرترین بینراو
© 2020 Awene Online, Inc. All Rights Reserved.
×