2020-10-31 483
وەزیری تەندروستیی توركیا ئاشكرایكرد، ژمارەی ئەو كەسانەی بەهۆی بومەلەرزەكەی ئیزمیرەوە گیانیان لەدەستداوە بەرزبووەتەوە بۆ 28 كەس و 885 برینداریش هەن.
ئاوێنه: لە تویتێكدا ئەمڕۆ شەممە 31ی تشرینی یەكەم فەخرەدین قۆجە، وەزیری تەندروستیی توركیا ڕایگەیاندووە، "642 برینداری بومەلەرزە سەختەكەی ئیزمیر چارەسەریان وەرگرتووە و نەخۆشخانەكانیان جێهێشتووە، 243 برینداری دیكەش لە قۆناغی وەرگرتنی چارەسەردان كە باری تەندروستیی سێ كەسیان خراپە".
وەزیرەكەی توركیا ئەوەشی خستوەتەڕوو، "ژمارەی ئەو كەسانەی بەهۆی ڕوداوەكە تا ئێستا مردوون بەرزبووەتەوە بۆ 28 كەس كۆی گشتیی بریندارانیش 885 كەسن".
دوێنێ هەینی 30ی تشرینی یەكەم بومەلەرزەیەك بە گوڕی 6.6 پلەی ڕێختەر ویلایەتی ئیزمیری گرتەوە و بە كارەساتێكی سروشتیی گەورە ناوبراوە.