جیراڵد دارمانان، وەزیری ناوخۆی فەرەنسا،
ئەمڕۆ دوشەممە، رایگەیاند، حكومەتی
وڵاتەكەی لەمیانی كۆبونەوەی داهاتوی خۆیدا رۆژی چوارشەممە، بڕیاری هەڵوەشاندنەوەی
بزوتنەوەی "گورگە بۆرەكان" دەدات كە بزوتنەوەیەكی نەتەوەپەرستیی توركی
توندڕەو و لایەنگری رەجەب تەیب ئەردۆغانە.
ئاوێنە: بزوتنەوەی "گورگە بۆرەكان" تۆمەتبارە
بە بەشداریكردن لەو شەڕو پێكداهەڵپژانانەی كە بەم دواییە لەنێوان هەردو رەوەندی
توركی و ئەرمەنیدا لە "دیسین-شاربیۆ" لەنزیك شاری لیۆن لە رۆژهەڵاتی
فەرەنسا رویاندا.
بزوتنەوەی "گورگە بۆرەكان" لە
شەستەكانی سەدەی رابردوەوە دامەزراوەو لە ریزی رێكخراوە فاشیە نەتەوەپەرست و
توندڕەوەكاندا پۆلێن دەكرێت و لە نەوەدەكانی سەدەی رابردوشدا بەشداربوە لە چەندین
ئۆپراسیۆنی چەكداری گەورەدا دژ بە كوردو پەكەكە لە توركیا.
ئەو بزوتنەوەیە
باوەڕی بە باڵابونی رەگەزی توركی هەیەو دژی نەتەوەكانی دیكەی وەك كورد و یۆنانی و
ئەرمەنەكانە.
فەرەنسا دەستیكردوە
بە هەڵمەتێك دژ بە رێكخراوە توندڕەوەكان ئەوەش دوای زنجیرەیەك هێرشی خوێناوی كە
بەم دواییە لەو وڵاتە رویاندا لە پەیوەست بە بڵاوبونەوەی كاریكاتێرەكانی پێغەمبەری
ئیسلام.