بەپێی ئاماری ئەمڕۆ(یەكشەممە)ی وەزارەتی تەندروستی عێراق، لەماوەی 24 سەعاتی رابردودا چاكبونەوە لە ڤایرۆسی كۆرۆنا زیاتر بوە لە توشبون بە ڤایرۆسەكەو كۆی توشبونیش بە كۆرۆنا لە سەرتاسەری وڵات نزیك بۆتەوە لە نیو ملیۆن كەس.
ئاوێنە: وەزارەتی تەندروستی عێراق، كەمێك لەمەوبەر، لە بەیاننامەیەكدا ئاشكرایكرد: لەماوەی 24 سەعاتی رابردودا، 15 هەزار و 965 پشكنینی كۆرۆنا لەسەرتاسەری وڵات ئەنجامدراون و بەپێی ئەنجامەكان دو هەزارو 530 كەسی دیكە توشی كۆرۆنا بون.
بەپێی بەیاننامەكە هەر لەماوەی 24 سەعاتی رابردودا سێ هەزارو دو توشبوی كۆرۆنا چاكبونەتەوەو 44 توشبوی دیكەش گیانیان لەدەستداوە كە زۆرترینیان لە هەرێمی كوردستان بون، بەمشێوەیە: 9 توشبو لە پارێزگای سلێمانی و 6 توشبو لە پارێزگای دهۆك و 6 توشبو لە پارێزگای هەولێر گیانیان لەدەستداوە.
وەزارەتی تەندروستی عێراق لە بەیاننامەكەیدا هێمای بۆ ئەوە كردوە كە بە تۆماركردنی ئەم حاڵەتە نوێیانە، كۆی توشبون بە كۆرۆنا گەیشتۆتە 498 هەزار و 549 كەس و لەوانە 11 هەزارو 327 كەسیان گیانیان لەدەستداوەو 428 هەزارو 928 كەسیان چاكبونەتەوەو 58 هەزارو 294 كەسیشیان لەژێر چارەسەردان كە لەوانە 388 توشبویان لەژێر چاودێری چڕدان.