2020-11-09 643
سەرچاوە ئەمنییەکانی عێراق، ئاشکرایانکرد کە شەوی ڕابردوو یەکشەممە 8ی تشرینی دووەم، چەکدارانی داعش هێرشێکیان لە ناوچەی ڕەزوانیەی ڕۆژئاوای بەغداد ئەنجامدا و بەهۆیەوە 11 کەس کوژران.
ئاوێنه: بەپێی میدیا عێراقییەکان، چەکدارانی داعش لە هێرشەکەیاندا، خاڵێکی چاودێریی هاوبەشی نێوان سوپای عێراق و حەشدی عەشائرییان، لە ناوچەی ڕەزوانیەی ڕۆژئاوای بەغداد کردووەتە ئامانج.
ئاماژە بەوەشکراوە کە لە هێرشەکەدا چەکدارانی داعش بۆمبی دەستییان بەکارهێناوە و ڕوبەڕووبوونەوە لەنێوان هێزە ئەمنییەکان و چەکدارانی داعشدا ڕوویداوە، دانیشتوانی ئەو ناوچەیەش پاڵپشتیی هێزە ئەمنییەکانیان کردووە.
بەپێی ئەو زانیارییانەی تاوەکو ئێستا لەسەر هێرشەکە ئاشکرا کراوە، پێنج ئەندامی حەشدی عەشائری و شەش مەدەنی کوژراون و هەشت کەسیش برینداربوون، دواتریش چەکدارانی داعش ناوچەکەیان چۆڵکردووە.