ئەحمەد مەلا تەڵال، وتەبێژی سەرۆك وەزیرانی عێراق رایگەیاند، كۆبونەوەی
ئەمڕۆی نێوان مستەفا كازمی و لیژنەی دارایی پەرلەمان ئیجابی بوەو چاوەڕێن رۆژی
پێنجشەممە پەرلەمان دەنگ لەسەر یاسای قەرزكردن بدات بۆ دەستكردن بە دابەشكردنی
موچە.
ئاوێنە: ئەحمەد مەلا تەڵال، ئێوارەی ئەمڕۆ دوشەممە، لە تویتێكدا رایگەیاند،
كەشێكی ئیجابی و هەستكردن بە بەرپرسیارێتی هاوبەش باڵی بەسەر دیدارەی ئەمڕۆی نێوان
مستەفا كازمی و لیژنەی دارایی پەرلەمانی عێراقدا كێشابو.
وتەبێژی كازمی وتوشیەتی"قوتی فەرمانبەران و پێویستی دابینكردنی
بەخێرایی، خەمی هاوبەشیان بوە."
هەروەها ئەوەشی
خستۆتەڕو"چاوەڕێین رۆژی پێنجشەممەی داهاتو دەنگ لەسەر یاسای پڕكردنەوەی
كورتهێنانی دارایی(یاسای قەرزكردن) بدرێت بۆ ئەوەی دەست بە دابەشكردنی موچەی
فەرمانبەران بكەین."