2020-11-10 540
دوای حەوت رۆژ لەهەڵبژاردنی سەرۆکایەتیی ئەمه‌ریکا، رەجەب تەیب ئەردۆغان سەركۆماری توركیا پەیامێكی پیرۆزبایی ئاراستەی جۆ بایدن سەرۆكی هەڵبژێردراوی ئەمریكا كرد.
ئاوێنه: بەگوێرەی راگەیەنراوێکی فەرمانگەی پەیوەندییەكان لەسەرۆكایەتی كۆماری توركیا، رەجەب تەیب ئەردۆغان "هیوای خواستووە كە ئەنجامی هەڵبژاردنەكان ببێتە مایەی خۆشی بۆ خەڵكی ئەمریكای دۆست‌و هاوپەیمان".
ئەردۆغان لەپەیامەكەیدا نوسیویەتی "هەرچۆن لەو كاتەی كە جێگری سەرۆك بون لەچەند بۆنەیەكدا باسمان لێكردبو، پەیوەندی نێوان توركیاو ئەمریكا، سروشتێكی ستراتیجیی هەیەو لەسەر بنەمایەكی ریشەدار بنیاتنراوە".
لەپەیامەكەی سەركۆماری توركیادا هاتووە، "لەو بەرەنگارییانەی كە رۆژانە لەسەر ئاستی جیهان و ناوچەکە روبەڕومان دەبێتەوە، بە پێویستی دەزانم کە پەیوەندییەکانمان پاڵپشت بە بەرژەوەندی و بەها هاوبەشەكان، پتەوتر و بەهێزتر بكەین. سووربوونی خۆمان نوێدەكەینەوە لەسەر كاركردن بەو ئاراستەیە و بە شێوەیەكی پتەو لەگەڵ ئیدارەی ئەمریكا لە قۆناغی داهاتوودا، دڵنیام کە هەماهەنگی بەهێز و پەیوەستی هاوپەیمانیی نێوانمان، بەردەوام دەبێت لە پێشكەشكردنی خزمەتی هەمیشەیی بە ئاشتی جیهانیی. پیرۆزبایی سەركەوتنتان لە هەڵبژاردنەكان دەكەم. لە ناخەوە هیوای خۆم بۆ ئاشتی و خۆشگوزەرانی خەڵكی ئەمریكا ئاراستەتان دەكەم".