وەزیری بەرگری ئەمریکا بە وەکالەت رایگەیاند، پرۆسەی کشانەوەی هێزەکانیان لە
عێراق و ئەفغانستان کێشیەکی مەترسیدارە، بەڵام سوپای وڵاتەکەی هیچ کات "دودڵ
نیە" لە وەڵامدانەوەی گروپە توندڕەوەکان ئەگەر بیانەوێت شکست بە پرۆسەکە بهێنن.
ئاوێنە: بەگوێرەی هەواڵێكی كەناڵی "ئەلحوڕە" کریستۆفەر میلەر وەزیری
بەرگری ئەمریکا بە وەکالەت رایگەیاندوە"هەر لایەنێک بیەوێت لە ئیرادەمان کەمبکاتەوە
یان شکست بە هەوڵەکانمان بدات، هیچ دودڵنابین لە وەڵامدانەوەی و شکستهێنان بە هەڕەشەکانیان".
پێشتر یەنس ستۆڵتنبێرگ سەرۆکی پەیمانی باکوری ئەتڵەسی "ناتۆ" بە
ئاشکرا رەخنەی لەهەنگاوەکەی ئەمریکا گرت لە کشانەوەی هێزەکانی لە ئەفغانستان و هۆشداریدا
لەوەی ئەو وڵاتە "جارێکی تر ببێتەوە بە پەناگەی رێکخراوە تیرۆرستیە نێودەوڵەتییەکان".
پاش دەستبەکاربوونی وەک وەزیری بەرگری ئەمریکا بە وەکالەت، کریستۆفەر میلەر
لەیەکەم لێدوانیدا رایگەیاند، لە ١٥ ی کانونی دوەمی داهاتو، ژمارەی هێزەکانی ئەمریکا
لە عێراق کەمدەکرێنەوە بۆ نزیکەی دو هەزار و ٥٠٠ سەرباز کە لە ئێستادا سێ هەزار سەربازن.
هاوکات ژمارەی ئەو سەربازانەی لە ئەفغانستان دەمێننەوە دو هەزار و ٥٠٠ سەربازدەبن
کە لە ئێستادا چوار هەزار و ٥٠٠ سەربازن.