وەزارەتی پێشمەرگە: رەوانەكردنی سەربازە هۆڵەندییەكان بۆ هەرێم بۆ دو مەبەستە
  2020-11-21       637       
راهێنەرێكی سەربازیی هۆڵەندی لەكاتی ئەنجامدانی مەشق بە پێشمەرگە

بەڕێوەبەری ڕاگەیاندن و رۆشنبیری وەزارەتی پێشمەرگە رایگەیاند، رەوانەکردنی ١٥٠ سەرباز لەلایەن ھۆڵەندا بۆ ھەرێمی کوردستان بۆ دو مەبەستە، ئەوانیش مەشق و راھێنان بەھێزی پێشمەرگە و ھاوکاریکردنی وەزارەتی پێشمەرگە لە پڕۆسەی چاکسازی.

ئاوێنە: ئەوەش لەكاتێكدایە كە وەزارەتی بەرگری ھۆڵەندا لە راگەیندراوێکدا باسی لەوە کردوە، کە ١٥٠سەربازی دیکە رەوانەی ھەرێمی کوردستان دەکەن كە ئەركیان پاراستنی فڕۆكەخانەی نێودەوڵەتی هەولێر دەبێت.

لیوا بابەکر فەقێ، بەڕێوەبەری ڕاگەیاندن و رۆشنبیری وەزارەتی پێشمەرگەی حکومەتی ھەرێمی کوردستان، بۆ ماڵپەڕی فەرمیی پارتی دیموکراتی کوردستان وتی"وڵاتی ھۆڵەندا ١٥٠ سەرباز رەوانەی ھەرێمی کوردستان دەکات، ئێستاش وڵاتی ھۆڵەندا لەگەڵ ئەمەریکا و بەریتانیا و ئەڵمانیا، بەردەوامن لە ھاوکاریکردنی ھێزی پێشمەرگە لە پڕۆسەی چاکسازی".

بەڕێوەبەری ڕاگەیاندن و رۆشنبیری وەزارەتی پێشمەرگەی حکومەتی ھەرێمی کوردستان وتیشی"ھاتنی ئەو١٥٠ سەربازەی کە بڕیارە ھۆڵەندا رەوانەی ھەرێمی کوردستانی بکات، بۆ دو مەبەستە، ئەوانیش ھاوکاریکردنی وەزارەتی پێشمەرگە لە پڕۆسەی چاکسازی و ئەنجامدانی مەشق و راھێنان بە ھێزی پێشمەرگە".

بڕیاردان لەبارەی ناردنی ئەو سەربازە هۆڵەندییانە بۆ هەرێمی کوردستان دوای ئەوە دێت؛ رۆژی 9-11-2020 مەسرور بارزانی، سەرۆکی حکومەتی هەرێمی کوردستان لە شاری لاهای لەگەڵ مارک روتە، سەرۆک وەزیرانی هۆڵەندا کۆبوەوە.

زۆرترین بینراو
© 2020 Awene Online, Inc. All Rights Reserved.
×