سەرۆكایەتی كۆماری عێراق رەتیدەكاتەوە كە یەكێك لە راوێژكارەكانی سەرۆك كۆمار هیچ پۆستێكی ئەمنی و سەربازیی لە كوردستان و سلێمانی هەبوبێت و دەشڵێت: یاساى عێراق رێگەنادات بەهیچ کەسێکى تێوەگلاوی تاوانەکانی بەعس کە پۆستى حکومى و پلەباڵاى هەبێت لە دامەزراوەکانى دەوڵەتى عێراق.
ئاوێنە: هانا قاسم لە نوسینگەی سەرۆک کومار، ئەمڕۆ دوشەممە، لە رونكردنەوەیەكدا رایگەیاند"لەهەندێک پەیجی سۆسیال میدیا هەواڵێکى ناڕاستى مەبەستدار بڵاوکراوەتەوە گوایە حاتەم عەبدولکەریم پێشتر بەڕیۆەبەرى ئەمنى سلێمانى بوەو ئێستا راوێژکارە لە سەرۆکایەتى کۆمار."
ئەوەشی خستۆتەڕو"حاتەم عەبدولکەریم عەلی، دەرچوى کۆلیژى سەربازى ساڵى ١٩٨٩یەو هەرگیز هیچ پۆستێکى ئەمنى و عەسکەری لە کوردستان و سلێمانى نەبوە. ئەمە وێڕاى ئەوەى یاساى عێراق رێگەنادات بەهیچ کەسێکى تێوەگلاوی تاوانەکانی بەعس کە پۆستى حکومى و پلەباڵاى هەبێت لە دامەزراوەکانى دەوڵەتى عێراق."
جەختیشی كردۆتەوە"سەرلەبەرى ئەو هەواڵەى بڵاوکراوەتەوە بەدرۆ دەخەینەوە ئەو هەواڵە دورە لەراستیەوەو تەنها ئامانجی پشتەوەى هەواڵەکە شێواندنى راى گشتى و بڵاوکردنەوەى بوختان و درۆیە."