مستەفا کازمی، فەرماندەی پۆلیسی پارێزگای زیقاری لە پۆستەکەی دورخستەوەو قەدەغەی هاتوچۆی لەو پارێزگایەدا راگەیاند ئەوەش بەهۆی گرژییەكانی دوێنێی نێو خۆپیشاندانەكان.

ئاوێنە: لیوا یەحیا رەسول، وتەبێژی فەرماندەی گشتی هێزە چەکدارەکانی عێراق راگەیاند، مستەفا کازمی سەرۆک وەزیرانی عێراق، بڕیاریدا بە دورخستنەوەی فەرماندەی پۆلیسی پارێزگای زیقار لە پۆستەکەی و پێکهێنانی لیژنەیەکی لێکۆڵینەوە لەبارەی روداوەکانی رۆژی هەینی پارێزگاکە، هەروەها راگەیاندنی قەدەغەی هاتوچۆ و هەڵوەشانەوەی مۆڵەتەکانی چەک هەڵگرتن.

ئاماژەی بەوەشکردوە، ئەو بڕیارەی کازمی، بەمەبەستی رێگریکردنە لە لێکەوتەکانی زیانگەیاندنی زیاتر بە ئاشتیی کۆمەڵایەتی لە عێراق.

بەگوێرەی سەرچاوە تەندروستییەکان، لە خۆپێشاندانەکانی رۆژی هەینی 27-11-2020ی باشوری عێراقدا گرژی لە نێوان لایەنگرانی رەوتی سەدر و خۆپێشاندەرانی دژە حکومەت رویدا، لە ئەنجامدا چوار کەس کوژران و دەیانی دیکە برینداربون، گرژییەکە کاتێک دروستبو کە هەزاران کەس لە لایەنگرانی موقتەدا سەدر رژانە سەر شەقامەکانی بەغدا و شاری ناسریەی ناوەندی پارێزگای زیقار.