بافڵ تاڵەبانی، هاوسەرۆكی یەكێتی رایگەیاند، چارەسەركردنی كێشەی موچەخۆرانی
هەرێم لەبەغدا بەڵام زۆر دژی ئەوەیە كە موچەی فەرمانبەرانی هەرێمی كوردستان
راستەوخۆ بخرێتە سەر بەغدا. جەختیشی كردەوە كە "گاڵتەی بە دو ئیدارەیی"
دێت. سەبارەت بە كەركوكیش وتی: حوكمی سەربازی هەیە لەو پارێزگایە.
ئاوێنە: بافڵ تاڵەبانی، هاوسەرۆکی یەکێتیی نیشتمانیی
کوردستان لە چاوپێکەوتنێکیدا لەگەڵ بەشێك لە میدیاکارانی کوردستان، كە ئەمشەو لەلایەن راگەیاندنی حزبەكەیەوە بڵاوكراوەتەوە، لەبارەی دو ئیدارەیی
و پرۆژەی لامەرکەزی رایگەیاند: گاڵتەم بە دو ئیدارەیی دێت، ئەو هەمو شەهید و خوێنەمان
رشت بۆ ئەوە نەبو کوردستان بکەینە دو ئیداریی، من باوەڕم بە دو ئیدارەیی نییە. لەبەرئەوە
ئێمە لەبەرنامەماندا نییە و بەرنامەیەکی دروست نییە.
سەبارەت بە رێككەوتنی 50 ساڵەی نەوت لەگەڵ توركیا، رایگەیاند كە ئاگاداری
ئەو رێككەوتنە نین، بەڵام وتیشی: یەكێتی تاڕادەیەك ئاگاداری دۆسیەی نەوتە.
لەگەڵ ئەوەی بافڵ تاڵەبانی پێی
وابو كە چارەسەركردنی كێشەی موچەخۆرانی هەرێم لە بەغدایە بەڵام ئاماژەی بەوەشدا كە
زۆر دژی ئەو هەوڵەی بەشێك لە پەرلەمانتارانە كە موچەی فەرمانبەرانی هەرێم راستەوخۆ
بخرێتە سەر بەغدا و وتیشی"نابێت هیچ بدەین بەغدا."
هەروەها لە بەشێكی دیكەی قسەكانیدا رایگەیاند، بەرنامەی پارتی و یەکێتی لە
حکومەت یەك بەرنامەیە، جگەلەوە هیچ شتێکی دیکە نییەو ئێمە نایبینین و دیدی جیاواز
لەنێو یەکێتی نییە. كاتێک من یان هەر هەڤاڵێکی دیکە لە یەکێتی دەچێتە لای حیزبێکی
دیکە بەیەکەوە بەرنامە دادەنێین و باشترین نمونەش دوایین کۆبونەوەمان بو لەگەڵ برایانی
پارتی و هەموشتێکیشمان باسکردوە.
سەبارەت بە پرسی چاكسازیش وتی"چاکسازیی
زۆر باس دەکرێت، ئەوەی لە حکومەت باسکراوە خراپ نییە، بەڵام لەبارەی موچە من لەگەڵیان
ناکۆکم نابێت وابێت. بۆیە دەبێت کارێکی زۆر لەسەر گەندەڵی شەخس و حیزبیش بکرێت. لەبەرئەوە
دەبێت حکومەت قورستر بێت لە بڕیارەکان و کۆمەڵێک شت هەیە دەبێت پێداچونەوەی بۆ
بکات."
هەروەها دەربارەی دۆخی كەركوكیش وتی"بەڵێ حوکمێکی سەربازیی هەیە لە کەرکوک."
هاوسەرۆكی یەكێتی ئەو بانگەشانەی بەشێك لە حزبە
ئۆپۆزسیۆنەكان و بەشێك لە پەرلەمانتارانی كوردی لە بەغدا راتكردەوە كە باس لەوە
دەكەن كە داهاتی ناوخۆی هەرێمی كوردستان بەشی موچە بكات و وتی"بەو داتایەی کە
من بینیومە پێموایە کە ئەو بۆچونە دروست نییە."