2020-12-01 640
قوباد تاڵه‌بانی جێگری سه‌رۆك وه‌زیرانی هه‌رێمی كوردستان ئاماژه بۆ ئه‌وه ده‌كات كه بەمنزیكانە شاندی حكومه‌تی هەرێمی كوردستان سه‌ردانی بەغدا ده‌كات بۆ گفتوگۆی زیاتر لەسەر چارەسەری كێشەكان.
ئاوێنه: له‌میانه‌ی كۆبونه‌وه‌ی له‌گه‌ڵ وه‌فدێكی باڵای به‌ریتانیا، قوباد تاڵه‌بانی ڕایگه‌یاند، "سوپاسی هەڵوێستی بەریتانیام كرد بەرامبەر ئامادەیی دەربڕینی هاوكاریی لەچارەسەركردنی كێشەكانی هەولێرو بەغداو رەتكردنەوەی بەكارهێنانی پرسی بودجەو شایستە داراییەكانی هەرێم وەك كارتێکی سیاسی".
وتیشی، "ئەوەشم بۆ جەیمس کلیڤەلی وەزیری دەوڵەتی بەریتانیا بۆ کاروباری رۆژهەڵاتی ناوەڕاست رونكردەوە؛ بەمنزیكانە شاندی هەرێم دەچێتە بەغدا بۆ گفتوگۆی زیاتر لەسەر چارەسەری كێشەكان."
ئه‌مرۆ سێشه‌ممه، وەفدی باڵای بەریتانیا کە پێکھاتبو لەجەیمس کلیڤەرلی، وەزیری دەوڵەت بۆ کاروباری ڕۆژهەڵاتی ناوەڕاست‌و باکوری ئەفریقیا، جەیمس هیپی، وەزیری دەوڵەت بۆ کاروباری هێزە چەکدارەکان‌و ستیڤن هیکی باڵیۆزی بەریتانیا لەعێراق سه‌ردانی هه‌رێمی كوردستانیان كردو له‌گه‌ڵ به‌رپرسانی باڵای حوكمی‌‌و حزبی هه‌رێم كۆبونه‌وه.