2020-12-02 568
پەرلەمانتارێكی پێشووی گۆڕان پێیوایە كە بە بێ گۆڕانكاری ریشەیی، ئەستەمە دۆخی حكومڕانی هەرێمی كوردستان چاك بێت.
ئاوێنه: مەحمود رەزا پەرلەمانتاری پێشووی گۆڕان بابەتێكی بە ناونیشانی "چاککردن یان گۆڕین؟" بڵاوكردووەتەوە و ئەوە دەخاتەڕوو كە حكومڕانی هەرێمی كوردستان لەوە دەرچووە كە لە رێی كاری پەرلەمانییەوە گۆڕانكاری تێدا بكرێت.
مەحمود رەزا دەڵێت: "هەر هێز و حیزب و لایەن و کەسێک بڵێ ئەم دەسەڵاتە لە ناوەوە ئەگۆڕم، یان گێل و نەفامە یاخود بۆ بەرژەوەندی تایبەتی خۆی، خەڵک و دەنگدەرەکانی چەواشە ئەکا".
هەروەها دەڵێت: "دەسەڵاتی کوردی پێی ناوەتە قۆناغێك کە بە هیچ جۆرێك چاک ناکرێ، بەڵکو ئەبێ لە ریشەوە بگۆڕدرێ".
روونیشیكردووەتەوە كە "مێژوووی مرۆڤایەتی نموونەیەکی وەکو ئەم دەسەڵاتەی هەرێمی تۆمار نەکردووە، توانیبێتی خۆی خۆی چاک بکا، یان هێزێکی لە خۆی کەم تواناتر چوبێتە ناوی و لە ناوەوە چاکی کرد بێ".
مەحمود رەزا پێی وایە دەبێت "هاوپەیمانییەكەی نیشتمانیی بەدیل" دروست بێت و دەنووسێت: "بە بێ ئەو هاوپەیمانیە و بەبێ خۆ تەرحکردن وەکو بەدیل و بە پرۆژەی بەدیلەوە، درێژەدان بە کار و چالاکیی سیاسی و بەشداریکردن لە هەڵبژاردنە گشتییەکاندا، بێجگە لە رتوشکردنی دەسەڵاتی مافیاکان و بەهێزتر کردنیان و رەنجەڕۆتر کردنی گەل، هیچ بەرهەمێکی نابێ"