2020-12-02   324     
بەرەبەیانی ئەمڕۆ چوارشەممە چەكدارانی داعش لە سنووری ناحیەی سەعدیەی سەر بە قەزای خانەقین، پەلاماری چەكدارانی حەشدی شەعبییان داوە.
ئاوێنه: ئەحمەد زڕگووشی، بەڕێوەبەری ناحیەی سەعدیە، راگەیاند: "كاتژمێر دووی بەرەبەیانی ئەمڕۆ چوارشەممە ٢ی١٢ی٢٠٢٠ چەكدرانی داعش لە گوندی "عەسریە"ی سەر بە ناحیەی سەعدیە پەلاماری چەكدارانی حەشدی شەعبییان داوە."
وتیشی: "شەڕەکە ماوەی كاتژمێرێكی خایاندووە و زیانی داعش نەزانراوە، بەڵام چەكدارانی حەشدی شەعبی زیانی گیانییان نەبووە و دواتر چەكدارانی داعش ناوچەكەیان بەجێ هێشتووە."
راشی گەیاند: "میلیشیاکانی لیوای 110ی حەشدی شەعبی دواتر لە ناوچەكە بڵاوەیان پێ كراوە."
ئەو هێرشە لە كاتێكدایە چەكدارانی میلیشیا شیعەكان پێشتر رایان گەیاندبوو مەترسیی داعش لە سنووری سەعدیە كۆتایی پێ هاتووە.