حزبی شیوعی كوردستان رایگەیاند، خۆپیشاندان مافی رەوانی هاوڵاتیانەو پشتگیری
لەو مافە دەكەن و داواش لە هێزە ئەمنییەكان دەكەن دوربكەونەوە لە بەكارهێنانی
توندوتیژی و چونكە كێشەكان بە بەكارهێنانی هێزو زەبروزەنگ چارەسەر نابن.
ئاوێنە: کۆمیتەی پارێزگای سلێمانی حزبی شیوعی کوردستان، ئەمڕۆ پێنجشەممە،
لە راگەیەندراوێكدا وتی"خۆپیشاندان مافی ڕەوای هەمو هاوڵاتیانەو پشتگیری لەمافی
ڕەوای موچەخۆرو خانەنشینان و کرێکاران دەکەین."
ئەوەشی
خستۆتەڕو"بانگەوازمان بۆ دامو دەزگا ئەمنیەکانی حکومەتی هەرێم ئەوەیە
پارێزەری خۆپیشاندەران بن و دوربکەونەوە لەبەکارهێنانی توندوتیژی چونکە چارەسەری
ململانێ و کێشەکانی نێوان خەڵک و حکومەت بە هێزو زەبروزەنگ چارەسەرناکرێت."
دەقی راگەیەندراوەكە...
خۆپیشاندان و ناڕەزایەتیەمەدەنیەکان مافێکی ڕەوای
خەڵکە
دەرئەنجامی بەردەوامبونی سیاسەتی ئابوری پیادەکراوی سەرمایەدارییانەی حکومەتی
هەرێمی کوردستان کە بوەتە هۆی قەیرانی ئابوری و پێنەدانی موچەو نەبونی هەلی کار بۆ
کرێکاران و دەرچوانی زانکۆو پەیمانگاکان، بەهەندوەرنەگرتنی ماف و داواکاری خەڵک بۆ
ئازادی و ژیانێکی شایستە، ماوەی دو ڕۆژە خۆپیشاندانی مەدەنیانەی مامۆستایان و موچەخۆران
و خەڵکی کرێکارو بەشمەینەت دەستی پێکردۆتەوە بۆ وەرگرتنی موچە لەکاتی خۆیداو بەتەواوەتی
و ڕەخساندنی هەلی کار بۆ بێکاران و فراوانکردنی مەوداکانی ئازادی گشتی، بەتایبەتی
لەناو شاری سلێمانی خۆپیشاندان بەردەوامی هەیە، بەڵام بەداخەوە بەردەوام هەندێک لەهێزە
ئەمنیەکان جگە لە ڕێگریکردن لەناڕەزایەتی خەڵکی، (گازی فرمێسکڕێژو لێدان و تەقەکردن)یان
بەکارهێناو بەوهۆیەوە دەیان خۆپیشاندەرو هاوڵاتی و تەنانەت پۆلیسش بەرکەوتەی گازەکە
بون و هاوکات ژمارەیەک لەخۆپیشاندەران دەستگیرکراون. دیارە ئەم کارانە پێچەوانەی
بنەماکانی ئازادی و دیموکراسییەو بەپێویستی دەزانین ڕاشکاوانە ڕای خۆمان ڕابگەیەنین
و ڕایگشتی لێ ئاگاداربکەینەوە :
1.خۆپیشاندان
مافی ڕەوای هەمو هاوڵاتیانەو پشتگیری لەمافی ڕەوای موچەخۆرو خانەنشینان و کرێکاران
دەکەین .
2.داواکارین دەستبەجێ هەرچی
خۆپیشاندەرو مامۆستایەک دەستگیرکراون ئازادبکرێن .
3.بانگەوازمان بۆ دامو دەزگا ئەمنیەکانی حکومەتی هەرێم ئەوەیە پارێزەری خۆپیشاندەران
بن و دوربکەونەوە لەبەکارهێنانی توندوتیژی چونکە چارەسەری ململانێ و کێشەکانی نێوان
خەڵک و حکومەت بە هێزو زەبروزەنگ چارەسەرناکرێت. خەڵکی چەندین ساڵە چاوەڕوانی جیبەجێکردنی
مافەکانیەتی نەک زیندان و بێکاری و بێ موچەیی.
سەرکەوتو بەردەوام بێت خەباتی مەدەنیانەی
خەڵکی کوردستان لەپێناو ماف و ئازدایەگشتیەکان.
کۆمیتەی پارێزگای سلێمانی
حزبی شیوعی کوردستان
۳-۱۲-۲۰۲۰