هێشتا زیاتر لەنیوەی دەستگیركراوەكانی خۆپیشاندانەكەی دوێنێی سلێمانی ئازاد نەكراون
  2020-12-04       613       

پاش ئەوەی دوێنێ‌ پێنجشەممە 3/ 12، نزیكەی 47 كەس لەسەر ئەنجامدانی خۆپیشاندان لەشاری سلێمانی دەستگیركران، كە زۆربەیان مامۆستا بون، هێشتا بەپێچەوانەی ئەوەی راگەیاندنی فەرمی یەكێتی بڵاویدەكاتەوە زیاتر لەنیوەیان ئازاد نەكراون.


ئاوێنە: دوێنێ‌ هەر لەبەیانییەوە تا پاشنیوەڕۆ، سەرا‌و ناو بازاڕی سلێمانی دۆخێكی نائارامی بەخۆیەوە بینی، كاتێك ژمارەیەك لەمامۆستایانی ناڕازیی‌و و چین و توێژە جیاوازەکانیان ویستیان لەسەرا درێژە بەخۆپیشاندان بدەن بۆ داواکردنی مافەکانی خۆیان، هەر لەگەڵ گەیشتنیان بەو شوێنە هێزێكی گەورەی ئەمنی چواردەوری گرتن‌و ژمارەیەك لەرێكخەرانی خۆپیشاندانەكەو هاوڵاتیانیان دەستگیر كردو بردیانن بۆ گرتوخانەی "كانی گۆمە".


بەپێی زانیارییەكانی ئاوێنە ئەو كەسانە هەر لەگەڵ دەستگیر كردنیاندا مۆبایلەكانیان لێسەندون‌و  پاش هێشتنەوەیان بۆ ماوەی چەند كاتژمێرێك لەو گرتوخانەکەو لێکۆڵینەوە کردن لەگەڵیان،  بەڵێننامەیان پێ پڕ كردونەتەوە كە جارێكیتر بەشداری لەخۆپیشاندانێكدا نەكەن بەشێوەی یاسایی مۆڵەتی بۆ وەرنەگیرابێت، نزیكەی ٢٠ كەسیان لەكاتژمێر 8ی ئێوارەی دوێنێدا ئازاد كراون.


 لەو مامۆستا ناڕازییانەی كە ئازاد كراون "دیاری عەبدولقادر، نەوشیروان حەمە غەریب، ئاكۆ محەمەد" بون، بەڵام هێشتا تا ئامادەكردنی ئەم هەواڵە بەشێكی زۆری مامۆستا دەستگیركراوەكان ئازاد نەكراون، لەوانە "عادل حەسەن، هاوژین عەبدوڵا، ئازاد حەمە فەرەج، دڵشاد بابانی، سادق، مادیح، رێبوار، تەها، هاوڕێ‌..".


زۆرترین بینراو
© 2021 Awene Online, Inc. All Rights Reserved.
×