عەتا سەراوی بۆ تیمی یەكێتی لە حكومەت: ئێوە چ كارەن؟
  2020-12-04       1254       

عەتا سەراوی، ئەندامی سەركردایەتی یەكێتی لە پەیامێكدا بۆ تیمی یەكێتی لەناو حكومەت رایگەیاند، ئیوە چ كارەن لەم حكومەتەو سەرقاڵی چین و توانیوتانە چی بگۆڕن لە سیستمی شكستخواردوی حوكمڕانی. داواش لە ئەندامان و لایەنگرانی حزبەكەی دەكات چیتر بێدەنگ نەبن بەرامبەر بەو دۆخەی كە هەیە.

ئاوێنە: عەتا سەراوی، لەنوسینێكدا لەلاپەڕەی خۆی، كە بەبۆنەی هەژدەیەمین ساڵڕۆژی هێرشی ئەنسارولئیسلام بۆ سەر فەرماندەیی 8ی شارەزور، پەیامێكی ئاڕاستەی سەركردایەتی حزبەكە، تیمی یەكێتی لە حكومەت و هەروەها ئەندام و لایەنگرانی حزبەكەی كردوە.

عەتا سەراوی لە پەیامەكەیدا بۆ سەركردایەتی حزبەكەی نوسیویەتی"دوای ساڵێک لە کۆنگرەی چوار کە کۆنگرەی نوێبونەوەو گەڕانەوە بۆ پرەنسیپەکانی ینکە، چیمان کردو یەکێتیمان دایە دەست کێ و ئایا نوێبوینەوە؟ سەرۆکایەتی یەکێتی لەکوێی ئەو ئەرکەن پێمان سپاردن."

هەروەها سەبارەت بە نوێنەرانی حزبەكەی لەناو حكومەت، ئەو وتویەتی"نوێنەرانی ینک لەحکومەت کێن و سەرقاڵی چین توانیویانە چی بگۆڕن لەسیستەمی شکستخواردوی حوکمڕانی و ژیان و گوزەرانی خەڵک، چەندی لەئەستۆی ئێمەیەو کێ بەرپرسە بەرامبەر موچەو بودجەی ئەم ھەرێمەو نەوت و غازو داھاتی ناوخۆو خاڵەسنورییەکان بۆ گیرفانی کێ ئەچێ و کێ ژیانی خەڵکی بەم ڕۆژەگەیاند؟! ئێوە چ کارەن لەم حکومەتەو ھۆکاری ئەم دۆخەی تێیی کەوتوین کێیە ئێوەن یان پدک؟ ئەی ئێوە چ کارەن لەوحکومەتە و ئەتانەوێت تا کەی بێدەنگ بین و ببینە شەریکی دز."

هەروەها وتوشیەتی"تا کەی بەردەوام ئەبن و ئێوە بەشێکن لەم دزی و کاری مافیایی و وڵات ھەڕاجکردنە یان نا؟ ئەگەر بێئاگان و شەریک نین و بێدەسەڵاتن چی ئێوەی لەو حکومەتە ھێشتوەتەوە پێتان وایە ینک ئەوەندە بێدەسەڵاتە ناتوانێ سەحبتان بکات، یان ینک-تان دیلی دەستی بەرژەوەندی شەخسی خۆتان کردوە."

هەروەها عەتا سەراوی لە بەشێكی نوسینەكەیدا پەیامێكی ئاڕاستەی خەڵکی کوردستان و ھەمو ئەندام و لایەنگرانی یەكێتی كردوەو وتویەتی"دڵنیام وردو درشت ئاگاداری ھەمو ڕوداو و کارو کرداری حیزبەکەتان و نوێنەرانی حیزبەکەتانن چ لەبەغدا لەسەرۆک کۆمارو وەزیرو پەرلەمانتار تا ھەولێر لەسەرۆکایەتی ھەرێم و پەرلەمان و حکومەت، ئایا ئێوە رازین لەوەی ئەیبینن، ئێوە ڕازی ئەبن ببنە بەشێک لەوەی کە ھەیە؟ دڵنیام وەڵامەکەتان نەخێرە، کەوایە چاوەڕێیی چین و تاکەی بێدەنگ ئەبن."

جەختیشی كردۆتەوە كە "چیتر بێدەنگی و چاوەڕوانی دادمان نادات تا کار لەکار نەترازاوەو لەھەڵبژاردنی ئایندەی عێراق حیزبەکەمانیان توشی شکست و ئابڕوچون نەکردوەو لەکوردستانیش تا یەکێتییان بەتەواوی نەکردوەتە بەشێک لەم زوڵم و ماف و نان و قوتی خەڵک دزینە و نەبوەتە کۆمپانیای چەند گروپێک، فەرمو بەدەنگ بێن."


زۆرترین بینراو
© 2021 Awene Online, Inc. All Rights Reserved.
×