"بۆ لە سلێمانی خۆپیشاندان بەئاسانی دەكرێت لەچاو هەولێر"، محەمەدی حاجی مەحمود وەڵام دەداتەوە
  2020-12-04       2180       

محەمەدی حاجی مەحمود، پێی وایە ئەوەی كە لە سلێمانی بە ئاسانی خۆپیشاندان ئەنجام دەدرێت و لە هەولێر بەو جۆرە نییە، بۆ چەند هۆكارێك دەگەڕێتەوە كە وادەكەن خەڵكی سلێمانی بەئاسانی كۆببنەوەو بگەنە بڕیار بەڵام بۆ خەڵكی هەولێر بەو جۆرە نییە، كە فرەپێكهاتەیی كۆمەڵگەی هەولێرو گەورەیی و گەرمی شارەكە بەو چەند هۆكارێك لەو هۆكارانە دەزانێت.

ئاوێنە: محەمەدی حاجی مەحمود، لەمیانی بەشداریكردنی لە بەرنامەیەكی كەناڵی كوردسات نیوزدا، خۆپیشاندانی بە مافی رەوای خەڵكی هەرێمی كوردستان زانی بەڵام بە جۆرێك كە خۆپیشاندەر مافی خەڵكی دیكە پێشێل نەكات.

لەوەڵامی ئەوەی كە لەكاتێكدا هەولێر پایتەختی حوكمڕانی هەرێمی كوردستانە، بەڵام زۆر جار خۆپیشاندانەكان لە سلێمانی و گەرمیان و هەڵەبجەو شارەزور ئاسانتر دەست پێدەكەن و ئەوە دو رۆژە لە سلێمانی خۆپیشاندانە بەڵام لە هەولێر كە ناوەندی بڕیارە، خۆپیشاندان نییە، هۆكاری ئەمە چییە؟ محەمەدی حاجی مەحمود وتی"تۆ ئەتەوێت وا وەڵامت بدەمەوە كە لە سلێمانی دیموكراتی هەیەو لە هەولێر نییە، بەڵام من وا ناڵێم. لەوەڵامی ئەوەی بۆچی لە سلێمانی خۆپیشاندان دەبێت و لە هەولێر نابێت، من جارێك وا وەڵامی چەند برادەرێكم دایەو وتم، سلێمانی بچوكە تەنها كوردی تێدا دەژی دەتوانن لەماوەیەكی كورتدا چونكە هەموی یەك دەناسێت كۆببنەوەو بڕیار بدەن، شوێنەكەش شاخاوییە..خەڵكەكەی خۆی بە موهیمتر دەزانێت لە خەڵكی دەشت، ئەوە هۆكارێكە...لە هەولێر شارەكە گەورەترە، توركمانی تێدایە، كلدو ئاشوری و عەرەبی تێدایە، ئەمانە هەموی لەسەر شتێك رێكناكەون و بڕیاری لێ بدەن."

وتیشی"هەروەها جیاوازییەكی تر ئەوەیە كە سلێمانی لە بنەماوە بۆ شار دروست بوە، بۆ نمونە دەڵێین گەڕەكی توی مەلیك و چوارباخ منداڵ شەڕە بەرد ئەكەن، بەڵام لە هەولێر دەوترێت عەشیرەتی فڵان و عەشیرەتی فیسار شەڕیان بوە."

محەمەدی حاجی مەحمود لە درێژەی وەڵامدنەوەی پرسیارەكە، وتیشی"هەروەها لەڕوی گەرماو سەرماوە، بۆ نمونە سلێمانی فێنكترو ساردترە، هەولێر گەرمترە، ئەوەش كاریگەری هەیە."

زۆرترین بینراو
© 2021 Awene Online, Inc. All Rights Reserved.
×