2020-12-04 344
جۆن ڕاتکلیف
بەڕێوەبەری دەزگای هەواڵگری نیشتیمانی ئەمریکا رایده‌گه‌یه‌نێت كه چین گەورەترین هەڕەشەیە بۆ سەر دیموکراسیەت. ئه‌و وڵته‌ش تۆمه‌تبار ده‌كات به‌تۆمەتی دزینی نهێنی کارو تەکنەلۆجیای بەرگری ئەمریکا.
ئاوێنه: لەوتارێکدا کە ڕۆژنامەی وۆڵ ستریت جێرناڵ بڵاویکردۆتەوە، جۆن ڕاتکلیف، بەڕێوەبەری دەزگای هەواڵگری نیشتیمانی ئەمریکا رایگه‌یاندووه، چین لەدوای جەنگی جیهانی دووەمەوە گەورەترین هەڕەشەیە بۆ سەر دیموکراسیەت و ئازادی لە جیهاندا. لەکاتێکدا واشنتن کۆتوبەندی خستە سەر پێدانی ڤیزا بەئەندامانی حیزبی شیوعی چینی.
ڕاتکلیف چین تۆمەتبار دەکات بەدزینی نهێنی کارو تەکنەلۆجیای بەرگری وڵاته‌كه‌ی.
ناوبراو نوسیویەتی، "لەمڕۆدا کۆماری گەلی چین گەورەترین هەڕەشەیە بۆ سەر ئەمریکاو لەدوای جەنگی جیهانی دووەمەوە گەورەترین هەڕەشەیە بۆ سەر دیموکراسیەت‌و ئازادی لەجیهاندا."
هەروەها باسی لەفشارە ئابورییەکانی بریکارە چینیەکان کرد کە هەوڵیانداوە لەڕێی ئەو فشارانەوە کاربکەنە سەر یاسادانەرانی ئەمریکا یاخود پێگەیان لاواز بکەن.
ڕاتکلیف نوسیویەتی، "زانیارییەکانمان دەریدەخەن پەکین بەڕێکخراویی ئەم جۆرە ئەرکانە جێبەجێ دەکات بۆ کارکردنە سەر ئەمریکا، سەرکردایەتی چین هەوڵدەدات مافەکانی تاک لەژێر ئیرادەی حیزبی شیوعیدا بێت."