بنەماڵەی كۆچكردو نەجمەدین كەریم، پارێزگاری پێشوی كەركوك لە رونكردنەوەیەكدا رایدەگەیەنن، ھەندێك كەس ناوی نەجمەدین كەریم بۆ دروستكردنی گروپ و حیزب و رەوتی سیاسی بەکاردەهێنن، "كۆچكردو دور و نزیک هیچ پەیوەندییەکی بەو کەسانەوە نەبوە."

 ئاوێنە: لە رونكردنەوەكەدا ھاتوە "داوا لە هەمو لایەك دەکەین، پابەندی رێکاری مافدارێتی بنەماڵەی کۆچکردو بۆ ناو و ناوبانگی دکتۆر نەجمەدین بن و سەربەخۆیانە ناو و ناوبانگی کۆچکردو بۆ هیچ پڕۆژەیەك بەکارنەهێنن، ھەر کەس و لایەنێک ناو و ناوبانگی دکتۆر نەجمەدین بەکاربێنێت بۆ بەرژەوەندی خۆیان رێکاری یاسایی دەگرینەبەر."

شەوی رابردو گروپێك وەك رەوتێكی سیاسیی و بەناوی "هاوڕێبازان"ی نەجمەدین كەریمەوە لە راگەیەنراوێكیدا داوایان لە رۆژنامەنوسان كرد لە شوقەكانی كەسنەزان لە هەولێر ئامادەبن بۆ رۆماڵكردنی كۆنگرەی رۆژنامەوانی راگەیاندنی "رەوتەكەیان" و پرسی بەشدارییان لە هەڵبژاردنی داهاتوی پەرلەمانی عێراق لەسەر ئاستی بازنەی كەركوك.

دەقی رونكردنەوەی بنەماڵەی نەجمەدین كەریم...

ماوەیەكە لێرە و لەوێ چاوپێکەوتنی میدیایی بە ناوی خزمی کۆچکردو دکتۆر نەجمەدین کەریم یاخود ناو وناوبانگی کۆچکردو دکتۆر نەجمەدین، بۆ دروستکردنی گروپ و حیزب و رەوتی سیاسی بەکاردەهێندرێت.

وەك بنەماڵەی کۆچکردو دکتۆر نەجمەدین، بە پێویستی دەزانین بۆ هەمو لایەکی رون بکەینەوە، کە کۆچکردو دور و نزیک هیچ پەیوەندیەکی بەو کەسانەوە نەبوە کە لە چاوپێکەوتنی میدیایی و دروستکردنی گروپ و رەوتی سیاسی ناو وناوبانگی دکتۆر بەکاردەهێنن.

هاوکات داوا لە هەمو لایەك دەکەین، پابەندی رێکاری مافدارێتی بنەماڵەی کۆچکردو بۆ ناو وناوبانگی دکتۆر  نەجمەدین بن و سەربەخۆیانە ناو وناوبانگی کۆچکردو بۆ هیچ پڕۆژەیەك بەکارنەهێنن، ھەر کەس و لایەنێک ناو و ناوبانگی دکتۆر نەجمەدین بەکاربێنێت بۆ بەرژەوەندی خۆیان رێکاری یاسایی دەگرینەبەر.

بنەماڵەی کۆچکردو

دکتۆر نەجمەدین کەریم