سەرۆكی كوتلەیەك لە ئەنجومەنی نوێنەرانی عێراق رایدەگەینێت ، وەفدی هەرێم لەگەڵ حکومەتی فیدراڵی نەگەیشتوەتە هیچ ڕێککەوتنێک.
حەسەن شاکر، سەرۆکی کوتلەی بەدر لە ئەنجومەنی نوێنەرانی عێراق لە لێدوانێكیدا رایگەیاند ، وەفدی هەرێم لەگەڵ حکومەتی فیدراڵی نەگەیشتوەتە هیچ ڕێککەوتنێک.
وتیشی : " کەس ناوی ئەو بانکانە نازانێت کە هەرێم داهاتی نەوتیان تێدا دادەنێت".
ئەوەیشی وت :" دەستور دەسەڵاتی فراوانی بە هەرێم داوەو ئێمە تێبینیمان هەیە لەسەری ، دەروازە سنوریەکان و فڕۆکەخانەکان پەیوەستن بە حکومەتی ناوەندییەوە".
دوێنێ چوار شەممە شاندی حكومەتی هەرێم و بەشێك لە پەرلەمانتاران و سەرۆكایەتیی ئەنجومەنی نوێنەرانی عێراق كۆبوونەوەو ئەنجومەنی نوێنەرانی عێراق پاڵپشتی لە چارەسەرێكی بنەڕەتی بۆ كێشەكانی نێوان هەولێر و بەغدا دەكات.
نووسینگەی جێگری سەرۆكوەزیرانی هەرێمی كوردستان رایگەیاند: لەدوای كۆبوونەوەكەی دوێنێ شاندی كوردستان و بەشێك لە پەرلەمانتاران و سەرۆكایەتیی ئەنجومەنی نوێنەرانی عێراق، محەمەد حەلبووسی وتوویەتی:" ئەنجومەنی نوێنەرانی عێراق پاڵپشتی لە دۆزینەوەی چارەسەرێكی بنەڕەتی بۆ كێشەكانی نێوان هەولێر و بەغدا دەكات".