وەزارەتی تەندروستی عێراق، ئەمڕۆ یەكشەممە، رایگەیاند، لەماوەی 24 سەعاتی رابردودا، یەك هەزارو 27 كەسی دیكە توشی ڤایرۆسی كۆرۆنا بون و 17 توشبوش گیانیان لەدەستداوە كە هەشتیان لە پارێزگای سلێمانی بون.
ئاوێنە: وەزارەتی تەندروستی عێراق، كەمێك لەمەوبەر، لە بەیاننامەیەكدا ئاشكرایكرد: لەماوەی 24 سەعاتی رابردودا، 33 هەزار و 937 پشكنینی كۆرۆنا لەسەرتاسەری وڵات ئەنجامدراون و بەپێی ئەنجامەكان یەك هەزارو 27 كەسی دیكە توشی كۆرۆنا بون.
بەپێی بەیاننامەكە هەر لەماوەی 24 سەعاتی رابردودا ژمارەی ئەو توشبوانەی لە ڤایرۆسەكە چاكبونەتەوە زیاتر بوە لەوانەی توشی كۆرۆنا بون بەشێوەیەك یەك هەزارو 964 توشبوی كۆرۆنا چاكبونەتەوە.
هەروەها ئاماژەی بەوەشداوە كە هەر لەو ماوەیەدا 17 توشبوی دیكەش گیانیان لەدەستداوە كە گیانلەدەستدانی هەشت توشبویان لە پارێزگای سلێمانی تۆماركراوە.
وەزارەتی تەندروستی عێراق لە بەیاننامەكەیدا هێمای بۆ ئەوە كردوە كە بە تۆماركردنی ئەم حاڵەتە نوێیانە، كۆی توشبون بە كۆرۆنا گەیشتۆتە 584 هەزار و 145 كەس و لەوانە 12 هەزارو 697 كەسیان گیانیان لەدەستداوەو 520 هەزارو 969 كەسیان چاكبونەتەوەو 50 هەزارو 479 كەسیشیان لەژێر چارەسەردان كە لەوانە 177 توشبویان لەژێر چاودێری چڕدان.