مستەفا كازمی، سەرۆك وەزیرانی عێراق رایگەیاند، پۆست و كورسی و بردنەوەی
هەڵبژاردنی لا گرنگ نین، جەختی لە هێنانەدی"چاكسازییەكی راستەقینە"
كردەوە بەبێ ئەوەی دەست بۆ "هەژاران و بێبەشان" ببرێت.
ئاوێنە: بەپێی ئاژانسی رەسمی هەواڵی عێراق، مستەفا كازمی، ئەمڕۆ یەكشەممە،
لە وتەیەكدا لە پەراوێزی كۆبونەوەی ئەنجومەنی وەزیراندا بۆ تاوتوێكردنی بودجە،
وتویەتی"هیچ كەسێك نایەوێت لەگەڵ گەلدا راستگۆ بێت و بەرپرسیارێتی چاكسازی
ریشەیی ئابوریی لە ئەستۆ بگرێت و بەتەواوی لە قەیرانەكە رزگارمان بكات."
سەرۆك وەزیرانی عێراق وتوشیەتی"من درۆتان لەگەڵ ناكەم، پۆست و كورسی و
بردنەوەی هەڵبژاردنم لا گرنگ نین. دەمەوێت راستگۆ بم لەگەڵتان، لەگەڵتان
دەمێنمەوەو پێكەوە كاردەكەین بۆ بەدیهێنانی چاكسازییەكی راستەقینە كە وڵات بەرەو
گەشەسەندنێكی راستەقینە ببات بەبێ دەستبردن بۆ هەژاران و بێبەشان."