هێزی دەریایی ئەمریكا، ئەمڕۆ دوشەممە، رایگەیاند، ژێردەریایی یو ئێس ئێس جۆرجیا، كە هەڵگری موشەكەو بە وزەی ئەتۆمی كاردەكات، بە گەورویی هورمزدا تێپەڕیوەو گەیشتۆتە سنورە ئاوییەكانی كەنداو.

ئاوێنە: هێزی دەریایی ئەمریكا ئاماژەی بەوەشداوە كە بونی ئەو ژێردەریاییە لە ناوچەكە، جەخت كردنەوەیە لەسەر پابەندبونی ئەمریكا بۆ هاوبەشەكانی لە ناوچەكەو هەروەها پاراستنی ئاسایشی دەریایی و ئامادەیی واشنتۆنە لە بەرگریكردن لە هەر هەڕەشەیەك.

بەگوێرەی میدیاكانی ئەمریكا، ژێردەریایی یو ئێس ئێس جۆرجیا توانای هەڵگرتنی 154 موشەكی لە جۆری كروز تۆماهۆك هەیە.

ناردنی ئەو ژێردەریاییە ئەمریكییە لەكاتێكدایە كە گرژیی لەنێوان ئەمریكاو ئێران لەناوچەكە لە ئارادایەو، مایك پۆمپیۆ، وەزیری دەرەوەی ئەمریكا هێرشە موشەكییەكەی شەوی رابردوی بۆ سەر ناوچەی سەوزی بەغدا دایە پاڵ گروپە چەكدارەكانی نزیك لە ئێران.

بەڵام وەزارەتی دەرەوەی ئێران ئیدانەی لێدوانەكانی پۆمپیۆی كردو رایگەیاند، باڵیۆزخانەی ئێرانیش هەر لەناوچەی سەوزی بەغدایەو هێرشکردنە سەر هەر نێردەیەکی دیپلۆماتی یان ناوچەکانی نیشتەجێبون هەڵەیە و لەلایەن یاسای نێودەوڵەتییەوە قەدەغەکراوە.