محەمەد حەلبوسی، سەرۆکى پەرلەمانی عێراق جەختدەکاتەوە کە دەستبردن بۆ موچەى فەرمانبەرانى ئاسایى هێڵى سورەو رایدەگەیەنێت، دادپەروەرى کۆمەڵایەتى بە کەمکردنەوەى موچەى فەرمانبەران بەدی نایەت كە لەلایەن حكومەتە یەك لەدوای یەكەكانەوە كراوەتە ئامانج لەژێر ناوی چاكسازی ئابوریدا.

ئاوێنە: محەمەد حەلبوسی، ئەمڕۆ پێنجشەممە، لە تویتێكدا رایگەیاند"موچەى فەرمانبەران هێڵى سورە"و وتیشی: عێراق پێویستى بە گه‌ڕان به‌دوای سه‌رچاوه‌ی زیاتر بۆ ده‌وڵه‌ت و به‌هێزكردنی ده‌سه‌ڵاتی یاسا له‌ ده‌روازه‌ سنوریه‌كان و ڕێگرى کردن له‌ قاچاخ و زیادكردنی داهاتی نانه‌وتی و ره‌خساندنی هه‌لی وه‌به‌رهێنانی ڕاسته‌قینه‌ بۆ دابینكردنی هەلى  كار بۆ بێكار و پێشکەشکردنى خزمه‌تگوزاریە بۆ هاوڵاتیان، نه‌ك په‌نابردن بۆ كه‌مكردنه‌وه‌ی موچه‌ی فه‌رمانبه‌ران کە بوەتە ئامانجی حكومه‌ته‌ یه‌ك له‌دوای یه‌كه‌كان له ‌ژێر ناوی چاكسازی ئابوری.

راشیگەیاندوە، دادپه‌روه‌ری كۆمه‌ڵایه‌تی پێویستی به‌ كه‌مكردنه‌وه‌ی موچه‌ی پله‌باڵا و پلەتایبه‌ته‌كان و لێپرسینەوە لەوانەى کە دو موچەیان هەیە،‌ نه‌ك كه‌مكردنه‌وه‌ی موچه‌ی فه‌رمانبه‌رێكی ئاسایى.

ئەو هەڵوێستەى سەرۆکى پەرلەمانی عێراق لە کاتێکدایە، لە پرۆژە یاساى بودجەى ساڵى (2021)ى عێراقدا كە لەلایەن ئەنجومەنی وەزیرانەوە پەسەندكراوەو رەوانەی پەرلەمان كراوە، چەند رێوشوێنێک بۆ کەمکردنەوەى موچەى فەرمانبەران گیراوەتەبەر.