فەرماندەیی
ئۆپەراسیۆنە هاوبەشەكانی سوپای عێراق دڵنیایی دەدات كە بەغدا ئارامەو هیچ
هەڕەشەیەكی لەسەر نییەو هەوڵە هەواڵگرییەكانیشیان چڕكردونەتەوە بۆ شوێنپێهەڵگرتنی
ئەنجامدەرانی هێرشە موشەكییەكان.
ئاوێنە: لیوا
تەحسین خەفاجی، وتەبێژی ئۆپەراسیۆنە هاوبەشەكانی سوپای عێراق، ئەمڕۆ شەممە، بە
ئاژانسی رەسمی هەواڵی وڵاتەكەی راگەیاند، ئەوان لەڕێگەی فەرماندەیی
ئۆپەراسیۆنەكانی بەغداوە توانای كۆنترۆڵكردنیب هەر حاڵەتێكی تێكچونی دۆخی ئەمنیان
هەیە.
جەختی كردۆتەوە
كە بەغدا ئارامەو هیچ هەڕەشەیەكی لەسەر نییە.
هەروەها
وتوشیەتی"فەرماندەیی ئۆپەراسیۆنە هاوبەشەكان هەوڵە هەواڵگرییەكانی چڕكردۆتەوە
بۆ شوێنپێهەڵگرتنی ئەوانەی هاوێژەرانی موشەكەكان و چاودێری ئەو رێكخراوانە كە
دەیانەوێت زیان بە یەكەكان و ئامانجە زیندوەكان بگەیەنن."
ئەو
لێدوانانە دوای ئەوە دێن كە هەندێك چەكدار بەناوی عەسائیبی ئەهلی هەقەوە، شەوی
رابردو هەڕەشەی روبەڕوبونەوەی حكومەتیان كرد ئەگەر ئەو سەركردەیەیان كە بە تۆمەتی
تێوەگلان لە هێرشە موشەكییەكەی رۆژی یەكشەممەی رابردو دەستگیركراوە، ئازاد نەكرێت.
ئەوەش پشێوی لە بەغدا دروست كرد.
لەبەرامبەردا
مستەفا كازمی، سەرۆك وەزیرانی عێراق لە تویتێكدا وتی"ئاسایشی عێراق سپاردەیە لە گەردنمان،
مل بۆ سەركێشی و هەنگاوی تاكلایەنە نادەین...داوای هێوركردنەوەمان كردوە بۆ
پاراستنی وڵات لە سەركێشی تری بێهودە، بەڵام ئامادەی روبەڕوبونەوەین ئەگەر پێویست
بكات."
هەر
شەوی رابردو مستەفا كازمی هێزە ئەمنییەكان و خەڵكی لە شەقامەكانی بەغدا لەهەردو
بەری كەرخ و رەسافە بەسەركردەوە.