مستەفا كازمی، سەرۆك وەزیرانی عێراق، ساڵی داهاتو لەڕوی ئەمنیەوە باشتر
دەبێت و داوای روبەڕوبونەوەی بەرگرتن لە چەكی دەرەوەی دەسەڵاتی دەوڵەت دەكات و دەشڵێت:
كۆنترۆڵكردنی سنورەكان سەرچاوەی ئارامی و سەقامگیرییە.
ئاوێنە: مستەفا کازمی، سەرۆک وەزیرانی عێراق،
ئەمڕۆ چوارشەممە لە وتەیەکدا لە کۆنگرەی ساڵانەی فەرماندەیی ئۆپراسیۆنە هاوبەشەکان
رایگەیاند؛ دەستکەوتەکانی ساڵی (2020) جێگەی شانازین، چونکە ساڵی لەناوبردنی تەواوەتی
داعش و لەکارخستنی چالاکییەکانیان بو، ساڵی داهاتوش لەڕوی ئەمنییەوە باشتر دەبێت.
داواشی لە وەزیرەکان
و دامەزراوەکانی دەوڵەت کرد کە هەماهەنگی لەگەڵ فەرماندەیی ئۆپەراسیۆنە هاوبەشەکان
بکەن، چونکە ماڵی گەورەی هێزە ئەمنییەکانە و لەو رێگەیەوە هەوڵ بدرێت سەرکەوتن بەسەر
تیرۆردا تۆمار بکرێت و شکۆ بۆ دەوڵەت بگێڕدرێتەوە.
مستەفا کازمی رایگەیاند؛
پێویستە هەوڵە هەواڵگرییەکان یەکبخرێنەوە و ئینتیما بۆ دەوڵەت بگێڕدرێتەوە، وتیشی:
کۆنتڕۆڵکردنی سنورەکان، سەرچاوەی ئارامی و سەقامگیری وڵاتە.
سەرۆک وەزیرانی
عێراق رونیشیکردەوە، ساڵی (2020)، ساڵی هەڵسەنگاندنی بەرپرسان و بەڕێوەبەرەکان بوە
لەسەر بنەمای کارەکانیان، کارەکان تەواو نەبون و ئاستەنگی زۆر ماوە، چەک لە دەستی
گروپە چەکدارەکان و بازرگانانی مادەی هۆشبەر و گروپە لە یاسا دەرچوەکانە، کە دەبێت
هەموان پێکەوە روبەڕویان ببینەوە.
سەبارەت بە هەڵبژاردنەکانی
داهاتوش، کازمی جەختی کردەوە کە دەبێت هەموان کار بکەن بۆ رەخساندنی ژینگەیەکی لەبار
و پارێزراو بۆ بەڕێوەچونی هەڵبژاردنەکان.