ئێوارەی ئەمڕۆ چوارشەممە، لەسەر رێگای دێرەزور-تەدمور لە بۆسەیەكی
چەكدارانی داعشدا دەیان كەس كوژراون. هەواڵی لێكدژ سەبارەت بە ناسنامەی كوژراوەكان
و ژمارەیان هەیە.
ئاوێنە: ئاژانسی رەسمی هەواڵی سوریا(سانا) رایگەیاندوە، لە هێرشێكی
چەكدارانی داعشدا بۆ سەر پاسێك لەسەر رێگای دێرەزور-تەدمور، 25 كەس كوژراون و 13ی
دیكەش برینداربون كە هاوڵاتی مەدەنی بون و بریندارەكان گوازراونەتەوە بۆ نەخۆشخانە
لە دێرەزور.
بەڵام روانگەی سوری بۆ مافەكانی مرۆڤ لە بەیاننامەیەكدا رایگەیاندوە، ئێوارەی
ئەمڕۆ، سێ پاسی سەربازیی فیرقەی چواری سوپای سوریا لەسەر رێگەی دێرەزور كەوتونەتە
بۆسەیەكی چەكدارانی داعشەوە لە ئاكامدا 30 سەرباز كوژراون و 15ی دیكەش برینداربون
كە برینی هەندێكیان سەختە.