وەزارەتی تەندروستی عێراق رایگەیاند، لە روداوەكانی شەوی سەری ساڵدا لە شارە جیاجیاكانی عێراق 62 كەس بریندار بون و یەك كەسیش گیانی لەدەستداوە. 30 لە بریندارەكان لە شاری كەركوكن.

ئاوێنە: وەزارەتەكە، ئەمڕۆ هەینی، لە بەیاننامەیەكدا رایگەیاند، 25 كەس بەهۆی یارییە ئاگرینەكانەوەو حەوت كەسیش بە فیشەك بریندار بون و كەسێكیش بە فیشەك گیانی لەدەستداوەو برینی هەندێك لە بریندارەكان سەختە.

بەپێی میدیا عێراقییەكان ئەو كەسەی گیانی لەدەستداوە لە بەغدا بوەو دوای بریندار بونی و گەیاندنی بە نەخۆشخانە مردوە.

هەروەها ئاماژەی بەوەشداوە كە لەمیانی ئاهەنگەكانی سەری ساڵدا لە كەركوك لە یەكێك لە مۆڵەكاندا ئاگركەوتۆتەوەو بەهۆیەوە 30 كەس برینداربون.

پێشتر بەرگری شارستانی كەركوك رایگەیاندبو، شەوی رابردو ئاگر لە نهۆمی نۆیەمی باڵەخانەی پلازا مۆڵ كەوتۆتەوە بەڵام هیچ زیانێكی گیانی نەبوەو لانیكەم 100 كەس رزگاركراون و ئاگرەكەش كۆنترۆڵكراوە.

ئەوەشی خستبوەڕو كە "ئاگرەکە بەهۆی یارییە ئاگرینەکانەوە بوەو بۆتە هۆی گڕگرتنی چێشتخانەی مۆڵەکە."