بەپێی ئاماری ئەمڕۆی وەزارەتی تەندروستی عێراق لەماوەی 24 سەعاتی رابردودا
11 توشبوی كۆرۆنا گیانیان لەدەستداوەو ژمارەی ئەوانەی لە كۆرۆنا چاكبونەتەوە زیاتر
بوە لەوانەی توشی كۆرۆنا بون و رێژەی چاكبونەوە لە ڤایرۆسەكەش لەسەدا 90ی
تێپەڕاندوە.
ئاوێنە: وەزارەتی تەندروستی عێراق، كەمێك لەمەوبەر، لە بەیاننامەیەكدا
ئاشكرایكرد: لەماوەی 24 سەعاتی رابردودا، 41 هەزار و 14 پشكنینی كۆرۆنا لەسەرتاسەری
وڵات ئەنجامدراون كە ئەوەش ژمارەیەكی پێوانەیی ئەنجامدانی پشكنینەو بەپێی ئەنجامەكان
902 كەسی دیكە توشی كۆرۆنا بون كە لەسەدا 2ی ژمارەی پشكنینەكان پێكدەهێنێت.
بەپێی بەیاننامەكە هەر لەماوەی 24 سەعاتی رابردودا ژمارەی ئەو توشبوانەی لە
ڤایرۆسەكە چاكبونەتەوە زیاتر بوە لەوانەی توشی كۆرۆنا بون بەشێوەیەك كە یەك هەزارو
976 توشبوی كۆرۆنا چاكبونەتەوە.
هەروەها ئاماژەی بەوەشداوە كە هەر لە ماوەی 24 سەعاتی رابردودا 11 توشبوی ڤایرۆسەكە
گیانیان لەدەستداوە.
وەزارەتی تەندروستی عێراق لە بەیاننامەكەیدا هێمای بۆ ئەوە كردوە كە بە تۆماركردنی
ئەم حاڵەتە نوێیانە، كۆی توشبون بە كۆرۆنا گەیشتۆتە 596 هەزار و 193 كەس و لەوانە
12 هەزارو 824 كەسیان گیانیان لەدەستداوەو 539 هەزارو 817 كەسیان چاكبونەتەوە كە
ئەوەش رێژەی لەسەدا 90.5ی توشبوان پێكدەهێنێت و هەروەها 43 هەزارو 552 توشبویشیان
لەژێر چارەسەردان كە لەوانە 153 توشبویان لەژێر چاودێری چڕدان.