هادی عامری، سەرۆكی هاوپەیمانی فەتح، ئەمڕۆ یەكشەممە، داوای لە حكومەتی عێراق كرد پابەندبێت بە بەڵێنەكانییەوە لەبارەی چونە دەرەوەی هێزە بیانییەكان لە عێراق لەپێش هەمویشیانەوە هێزەكانی ئەمریكا كە تاوەكو ئێستا هیچ هەنگاوێكی پێویست لەوبارەیەوە نەنراوە.

ئاوێنە: هادی عامری لەمیانی وتەیەكیدا بە بۆنەی ساڵیادی كوژرانی قاسم سولەیمانی، فەرماندەی فەیلەقی قودسی سەربە سوپای پاسداران و ئەبو مەهدی موهەندیس، جێگری سەرۆكی حەشدی شەعبیەوە، رایگەیاند"دەبێت حكومەت پابەند بێت بە چونە دەرەوەی سەرجەم هێزە بیانییەكان لە پێش هەمویشییانەوە هێزەكانی ئەمریكا، ئەوەش بەگوێرەی خشتەیەك بۆ كشانەوەیان."

سەرۆكی هاوپەیمانی فەتح نیگەرانی خۆیشی دەربڕی كە "تاوەكو ئێستا هیچ هەنگاوێكی پێویست و خوزراو لەوبارەیەوە نەنراوە."

هادی عامری لە بەشێكی دیكەی قسەكانیدا داوای لە حكومەتی عێراق كرد بگەڕێتەوە بۆ ئەو رێككەوتنەی لەگەڵ وڵاتی چین كراوە كە "لەبەر چەند هۆكارێكی نادیار پەكخراوە، لەكاتێكدا ئێمە ئەمڕۆ زۆر پێویستمان بەو رێككەوتنە هەیە."