ئاسایشی رۆژئاوای سلێمانی رایگەیاند، لەماوەی 30 رۆژی رابردودا چوار كەسیان
بەتۆمەتی بەكارهێنانی ماددەی هۆشبەر دەستگیركردون كە یەكێكیان ژنە.
ئاوێنە: بەڕێوەبەرایەتی ئاسایشی رۆژئاوای سلێمانی، ئێوارەی ئەمڕۆ سێشەممە،
لە راگەیەندراوێكدا وتی"لەدرێژەی هەوڵەکانی هێزەکانمان بۆ ڕێگرکردن لەبڵاوکردنەوەی
ماددەی هۆشبەرو کڕین و فرۆشتن پێوەی لەماوەی (۳۰) ڕۆژی ڕابردودا چوار کەس دەستگیرکراون."
ئاماژەی بەوەشداوە كە تۆمەتبارەکان یەکێکیان ژنەو دانیشتوی
بازیانە، سیانەکەی تریش لەڕەگەزی نێرن و دوانیان دانیشتوی چەمچەماڵن، ئەویتریشیان
دانیشتوی کەرکوکە.
سەبارەت بە جۆری
ئەو ماددانەی بەكاریانهێناون ئاسایشی وتویەتی كە "حەبی ترامادۆڵ و کریستاڵن."
جەختیشی
كردۆتەوە كە سەرجەم تۆمەتبارەکان بەبڕیاری دادوەری دادگای لێکۆڵینەوەی چەمچەماڵ بەپێی
ماددەی (۱٤)ی هۆشبەر راگیراون.