دەزگای لوتكە بۆ كاروباری ئاوارەو پەنابەران، ئەمڕۆ پێنجشەممە، رایگەیاند، هەفتەی رابردو كۆمەڵە كۆچبەرێكی ئیزیدی لە توركیاوە بەرەو یۆنان بەڕێكەوتون و لە رێگادا كۆچبەرێكیان كەوتۆتە نێو دەریاو خنكاوەو تا ئێستا تەرمەكەی نەدۆزراوەتەوە.

ئاوێنە: بەپێی راگەیەندراوێكی دەزگای لوتكە،نوێنەری دەزگاكە لە توركیا، کوردە یەشار، رایگەیاندوە هەفتەی ڕابردو کۆمەڵە کۆچبەرێکی ئێزیدی کە ژمارەیان ١١ کەس بوە، بەرەو یۆنان بەڕێکەوتون و لە ڕێگادا کۆچبەرێکیان کەوتوەتە دەریاکەوەو خنکاوە.

ئەوەشی خستۆتەڕو، كۆچەرەكان وتویانە، پاش ئەوەی گەیشتونەتە سنوری یۆنان، پاسەوانانی سەر سنوری یۆنان مۆبایل و کەلوپەلەکانیان لێسەندون و توندوتیژیان بەرامبەرکردون دواتر بە تێهەڵدان نێردراونەتەوە سنوری تورکیا.

کوردە یەشار ڕاشیگەیاند کە باڵوێزخانەی عێراق لە ئەنقەرە هاوکارییان کردون بۆ ئەوەی بەشێوەیەکی فەرمی بەشوێن تەرمەکەدا بگەڕێن، لە ئێستاشدا نوێنەرمان لەگەڵ پۆلیسی دەریای تورکی و پاسەوانانی سنوری تورکیا بەدوای تەرمی کچە یەزیدییەکەدا دەگەڕێن، بەڵام تا ئێستا نەدۆزراوەتەوە.