2021-01-08 1463
هۆشیاری زێباری
هۆشیاری زێباری، ئەندامی مەكتەبی سیاسی پارتی دیموكراتی كوردستان به‌دوری نازانێ حیزبه‌كه‌ی بۆ هه‌ڵبژاردنی داهاتوی په‌رله‌مانی عێراق لەگەڵ لایەنە سوننەو شیعەكان هاوپەیمانێتی ئه‌نجامبده‌ن.
ئاوێنه: لەچاوپێكەوتنێكدا لەگەڵ كەناڵی (الشرقیە) هۆشیاری زێباری له‌باره‌ی هه‌ڵبژاردنی داهاتوی په‌رله‌مانی عێراق ڕایگه‌یاندووه، "بیرۆكەیەك هەیە كە هێشتا بەباشی گەڵاڵە نەبووە، ئەویش ئەوەیە ئێمە بۆ تەنیا بیر لەچوارچێوە بەرتەسكەكەی كورد بكەینەوە، بۆچی هاوپەیمانێتی دەرەوەی نەتەوە‌و مەزهەب نەكەین، واتا لیستی تێكەڵ، لەراِستیدا ئەمە باسكراوە، لەمبارەیەوە هێشتا بڕیار نەدراوە".
ناوبراو ده‌ڵێت، "بەدوری نازانم، دەكرێت لەگەڵ ئەو لایەنانەی سوننە یاخود شیعە هاوپەیمانێتی بكەین كە نزیكن لێمان‌و دەتوانین بگەینە رێككەوتن پێكەوە."
به‌پێی ئه‌و واده‌یه‌ی مسته‌فا كازمی، سه‌رۆك وه‌زیرانی عێراق دیاریكردووه، بڕیارە رۆژی 6ی حوزەیرانی 2021 هەڵبژاردنی په‌رله‌مانی عێراق بەڕێوەبچێت.
به‌ڵام هۆشیاری زێباری پێیوانییه كه هەڵبژاردنی پێشوەختەی عێراق لەكاتی خۆیدا ئه‌نجامبدرێت‌و رەنگە دوا بخرێت بۆ كۆتایی ساڵ.
له‌باره‌ی ژماره‌ی كورسییه‌كانی كورد له‌په‌رله‌مانی داهاتوی عێراق، ئه‌ندامه‌كه‌ی مەكتەبی سیاسی پارتی ڕایگه‌یاندووه، هەڵبژاردنی پێشوەختەی عێراق بەو یاسا نوێیەی هەڵبژاردنەوە، زۆر كاریگەری لەسەر قورسایی كورد نابێت، رەنگە چەند كورسییەك زیاد‌و كەم بكات، "بەخەمڵاندنی ئێمە، پارتی‌و یەكێتی‌و ئەوانی تریش پارێزگاری لەپێگەی خۆیان دەكەن".