2021-01-12 716
مه‌سرور بارزانی
مەسرور بارزانی ده‌ڵێت، هەرێم هەموو ئەرکە دەستورییەکانی خۆی جێبەجێکردووە، بۆیە دەبێت دەسەڵاتی فیدراڵیش ماف‌و شایستە داراییەکانی هەرێم لەچوارچێوەی پڕۆژە بودجەی فیدڕاڵی بۆ ساڵی 2021 دابین بکات.
ئاوێنه: ئەمڕۆ سێشەممە، ئەنجومەنی باڵای ئابوری هەرێمی کوردستان بەسەرپەرشتی مەسرور بارزانی، سەرۆکی حکومەتی هەرێمی کوردستان کۆبوەوە.
به‌پێی راگه‌یه‌ندراوی حكومه‌ت، لەکۆبونەوەکەدا گفتوگۆ دەربارەی دیاریکردنی هێڵە گشتییەکانی پڕۆژە یاسای بودجەی ساڵی 2021ی هەرێمی کوردستان و هەنگاوەکانی پرۆسە چاکسازیی کراوه.
هەریەک لەوەزیرانی دارایی و ئابووری ئاوات شێخ جەناب و پلاندان دارا ڕەشید ڕاپۆرتێکیان دەربارەی دۆخی ئێستای دارایی و ئامادەکارییەکانی پڕۆژە یاسای بودجەی 2021 خستەڕوو.
سەرۆکی حکومەت ئاماژەی بەوەدا کە حکومەتی هەرێم هەمو هەوڵێکی خستووەتەگەڕ لەپێناو رێکخستنەوەی داهاتەکان و کەمکردنەوەی خەرجییە ناپێویستەکان و رێکخستنەوەی میلاک و دەرھێنانی ناوی ئەو کەسانەی کە بە شێوەیەکی ناڕەوا سوودمەندبوون لەبودجەی گشتی، بۆئەوەی ماف و شایستەی دارایی مووچەخۆری شایستە دەستەبەر بکرێت، سەرەڕای کارکردن بۆ کەمکردنەوەی رۆتین لە راییکردنی مامەڵە داراییەکان.
جەختیشی لەوەشکردەوە کە پێویستە لەئامادەکردنی پڕۆژە یاسای بودجەی 2021 ، هەموو ئەگەرەکان لە بەرچاو بگیرێت و بودجەیەکی واقیعی و شەفاف بێت و پشت بە ژمارە و داتا و داهاتی نەوتی و نانەوتی و خەرجی ڕاستەقینە و کورتھێنان و دۆخی دارایی ئێستای هەرێمی کوردستان ببەستێت کە لە دوای پەسەندکردنی لە ئەنجومەنی وەزیران، دەخرێتە بەردەم پەرلەمانی کوردستان و ئەم بودجەیە دەبێتە هۆی برەودانی زیاتر بە شەفافیەت لە دارایی گشتی ھەرێم .
سەرۆکی حکومەت دووپاتی کردۆتەوە کە هەرێمی کوردستان لەپێناو چارەسەرکردنی کێشەکان لەگەڵ حکومەتی فیدراڵی، هەموو ئەرکە دەستوورییەکانی خۆی جێبەجێ کردووە، بۆیە دەبێت دەسەڵاتی فیدراڵیش ماف و شایستە داراییەکانی هەرێم لەچوارچێوەی پڕۆژە بودجەی فیدڕاڵی بۆ ساڵی 2021 دابین بکات.
لەتەوەری دووەمی کۆبوونەوەکەدا، بەرپرسی فەرمانگەی هەماهەنگی و بەدواداچوون عەبدولحەکیم خسرۆ، ڕاپۆرتێکی دەربارەی هەنگاوەکانی جێبەجێکردنی بڕیارەکانی پێشووی ئەنجومەنی باڵای ئابووری خستۆتەڕو.
بڕیارە دەرئەنجامی کۆبونەوەکە سەبارەت بەھێڵە گشتیەکانی ڕەشنوسی بودجەی ھەرێم، سبەی لەکۆبونەوەی ئەنجومەنی وەزیران بخرێتەڕو.