2021-01-13   910     
وەزارەتی ئەوقاف و کاروباری ئاینی هەرێمی کوردستان ڕایگەیاند تاوەکو ئێستا هیچ بڕیارێک نییە بۆ دەستپێکردنەوەی عومرە بۆ هاوڵاتییانی عێراق و هەرێمی کوردستان، داواشدەکەن هیچ کەسێک ناو لەلای کۆمپانیاکانی حەج و عومرە تۆمار نەکەن.
ئاوێنه: لە ڕاگەیەنراوێکدا بەڕێوبەرایەتیی حەج و عومرەی سەربە وەزارەتی ئەوقاف و کاروباری ئاینی بڵاویکردەوە، “دوای وەستاندنی گەشتەکانی عومرە بەھۆی ڤایرۆسی کۆرۆنا لە 2020/2/28 تاوەکو ئەمڕۆ ھیچ بڕیارێکی فەرمی لەلایەن وڵاتی عەرەبستانی سعودیەوە نیە بۆ دەستپێکردنەوەی گەشتەکانی عومرە بۆ ھاوڵاتییانی عێراق و ھەرێمی کوردستان”.
لە ڕاگەیەنراوەکەی وەزارەتی ئەوقافدا هاتووە، “ھاوڵاتیانی ئازیز ئاگادار دەکەینەوە تاوەکو بەڕێوەبەرایەتی گشتی حەج و عومرە بەفەرمی دەست پێکردنەوەی گەشتی عومرە ڕانەگەێنێ ناوی خۆیان لای ھیچ کۆمپانیایەکی تایبەت بەعومرەکاران تۆمار نەکەن.”
ئاماژەی بەوەشکردووە، “سەرجەم کۆمپانیاکانی حەج و عومرە ئاگادار دەکەینەوە کە ناتوانن بەبێ دەرچوونی بریاری فەرمی لەلایەن بەڕێوەبەرایەتی گشتی حەج و عومرە ھیچ ھەنگاوێک بنێن، بەپێچەوانەوە بەپێ ی یاساو رێنمایەکان مامەڵەيان لە گەل دەكرێت.”