رێكخراوی هیومان رایتس ۆوچ، ئەمڕۆ چوارشەممە، رایگەیاند، لەساڵی 2020دا دەسەڵاتدارانی ئێران چالاكییە ئاشتیخوازانەكانی سەركوتكردون و هەروەها چەندین پارێزەرو داكۆكیكاری مافەكانی مرۆڤ و ئەوانەشی زیندانی كردون كە ناڕەزایەتییان بەرامبەر گەندەڵی و خراپی بەڕێوەبەردن و سەركوتكردنەكان دەربڕیوە.

ئاوێنە: رێكخراوەكە لە راپۆرتی ساڵانەی خۆیدا دەربارەی جیهان، سەبارەت بە ئێران ئاماژەی بەوەداوە كە لەمیانی بەرەنگاربونەوەی تەشەنەكردنی كۆرۆنادا لەو وڵاتە، دەسەڵاتداران، دەیان داكۆكیكاری مافەكانی مرۆڤ و زیندانیانی سیاسییان بەدەركردون لە رێكارەكانی ئازادكردنی كاتی، وەك دانانی سنورێك بۆ قەرەباڵغی زیندانەكان.

هەروەها هێمای بۆ ئەوە كردوە كە دەسەڵاتدارانی ئێران بەردەوامبون لە زیندانیكردنی داكۆكیكارانی مافەكانی مرۆڤ و ئەوانەی رەخنەیان لە رەفتارەكانی حكومەت گرتوە بەڵام هیچ هەنگاوێكیان نەناوە بۆ لێپێچینەوەی ئەوانەی پێشێلی مافەكانیان كردوە بەتایبەت هێزە ئەمنییەكان كە ئەوپەڕی هێزی كوشندەیان بەكارهێنا بۆ سەركەوتكردنی خۆپیشاندەران لە مانگی تشرینی دوەمی 2019دا.

هەروەها جێگری بەڕێوەبەری بەشی رۆژهەلاتی ناوەڕاست و باكوری ئەفریقا لە هیومان رایتس ۆوچ ئاماژەی بەوەداوە كە وێڕای ئەو قەیرانە جیۆسیاسی و تەندروستی و ئابورییانەی روبەڕوی وڵاتەكە بونەتەوە، بەڵام دەسەڵاتدارانی ئێران وەك هەڕەشەی یەكەم مامەڵە لەگەڵ كۆمەڵگەی مەدەنی ناوخۆییدا دەكەن.

هەروەها لە بەشێكی دیكەی راپۆرتەكەدا ئەوە خراوەتەڕو كە ئێران یەكێكە لەو وڵاتانەی كە زۆترین سزای لە سێدارەدانی تێدا جێبەجێ دەكرێت و لەساڵی 2020دا تاوەكو 19ی تشرینی دوەمی هەمان ساڵ 233 كەس لە ئێران لە سێدارەدراون كە لەنێویاندا كەسانێك هەبون لەسەر ئەو تاوانانە سزادراون كە لەتەمەنی منداڵیاندا ئەنجامیان داون.