پۆلیسی سلێمانی روونکردنەوەیەکی لەبارەی بڵاوکردنەوەی ڤیدیۆی هاوشێوەی ژنە بێلانەکە دەرکرد
  2021-01-14       680       
پۆلیسی سلێمانی لە روونکردنەوەیەکدا رایگەیاندووە، هەرکەسێک ڤیدیۆی هاوشێوەی ژنە بێلانەکەی سلێمانی بڵاوبکاتەوە و "لە تۆڕە کۆمەڵایەتییەکان خۆی بەپاڵەوان بکات"، ناچار دەبن رووبەڕووی یاسا و دادگای بکەنەوە.

ئاوێنە: بەڕێوەبەرایەتیی پۆلیسی پارێزگای سلێمانی لە روونکردنەوەکەیدا ئاماژەی بەوە کردووە "پاش ئەوەی لەسەر راسپاردەی بەڕێوەبەری پۆلیسی پارێزگای سلێمانی، ژیانی ژنێکی دەروون نەخۆش و بێلانە رزگارکرا، بەڵام لەلایەن هەندێک کەسەوە لە تۆڕە کۆمەڵایەتییەکان، بانگەشەی ئەوە دەکرێت کە ئەوان ژیانی ئەو ژنەیان رزگارکردووە".

دوای بڵاوبوونەوەی گرتە ڤیدیۆیی ئەو ژنە لە تۆڕە کۆمەڵایەتییەکان، رووداو بەدواداچوونی بۆ ئەو پرسە کرد و پۆلیس و تەندروستیی سلێمانی لەسەری هاتنە سەر خەت و ژنەکە گواسترایەوە بۆ نەخۆشخانەی چارەسەری نەخۆشییە دەروونییەکان.

بەپێی راگەیێندراوی پۆلیسی سلێمانی، "دوای وەرگرتنی بڕیاری بەڕێز دادوەر، بنكەی پۆلیسی سەرا لێكۆڵینەوەكانی دەستپێكرد و ژنەكە دۆزرایەوە و بە هاوكاری د. سەباح هەورامی، بەڕێوەبەری تەندروستیی سلێمانی گواسترایەوە بۆ نەخۆشخانەی چارەسەری نەخۆشییە دەروونییەكان‌ و ئێستا لەو نەخۆشخانەیە چارەسەری پزیشكی وەردەگرێت".

لە کۆتایی روونکردنەوەکەدا، پۆلیسی سلێمانی هۆشداریی داوە و دەڵێت "له ‌حاڵه‌تی‌ دووباره‌بوونه‌وه‌ی‌ هه‌ر كارێكی‌ له‌و جۆره‌ و خۆبه‌پاڵه‌وانكردن له ‌تۆڕه ‌كۆمه‌ڵایه‌تییه‌كان، ناچارده‌بین ئه‌و كه‌سانه‌ رووبه‌ڕووی‌ یاسا و دادگا بكه‌ینه‌وه‌".
زۆرترین بینراو
© 2021 Awene Online, Inc. All Rights Reserved.
×