فراكسیۆنی یەكگرتوی ئیسلامی لە پەرلەمانی كوردستان رایگه‌یاند، پاراستنی شكۆی پەرلەمان بە تۆماركردنی سكاڵا لەسەر كلیپێك نابێت به‌ڵكو چه‌ندین بابه‌ت هه‌یه‌ پێویسته‌ په‌رله‌مان هه‌ڵوێستی له‌سه‌ر هه‌بێت تا شكۆی پارێزراو بێت.

ئاوێنە: ئەمڕۆ پێنجشەممە، بەشی یاسایی پەرلەمانی كوردستان بە بیانوی شكاندنی شكۆی پەرلەمان سكاڵای یاساییان لەسەر هەردو هونەرمەندی دەڤەری بادینان هەڵگورد قەهار و شیرین محەمەد تۆماركرد كە لە ماوەی رابردودا كلیپێكی رەخنەئامێزیان لەسەر پەرلەمان بڵاوكردبوەوە.

لەو بارەوەیە فراكسیۆنی یەكگرتوی ئیسلامی  لە راگەیەندراوێكدا وتی: ئێمە پاراستنی شكۆی پەرلەمان لە جوڵاندنی سكاڵایەكدا نابینینەوە كە دژی كلیپێكی رەخنەئامێز تۆماركراوە، بەڵكو ئه‌گەر سەرۆكایەتی پەرلەمان سورە لەسەر پاراستنی شكۆی ئەو دەزگایە، ئەوا پێویستە سەرقاڵ بێت بە خەمەكانی گەل و نیشتیمان و هەوڵی دابینكردنی موچەی فەرمانبەران و دامەزراندنی دەرچوانی زانكۆ و پەیمانگاكان و سنورداركردنی پێشێلكارییە نایاساییەكانی ئەنجومەنی وەزیران.

جەختیشی كردۆتەوە كە "شكۆی پەرلەمان بەوە دەگەڕێتەوە كە پەرلەمان هەڵوێستی هەبێت لەسەر دواخستن و لێبڕینی موچە، شكۆی پەرلەمان بە شەفافكردنی سێكتەری نەوت و كۆتاییهێنان بە قاچاخچیەتی سنورەكان دەگەڕێتەوە، هەروەها پەرلەمان دەبێت لە خەمی پاراستنی تەندروستی هاوڵاتیان بێت و رێگەنەدات خۆراكی ماوە بەسەرچو و دەرمانی بێكەڵك بهێندرێتە ناو هەرێمەوە. پێویستە پەرلەمان لە خەمی كەركوك و ناوچە دابراوەكان بێت ئەو كات شكۆی په‌رله‌مان پارێزراو دەبێت."

فراكسیۆنی یەكگرتو بەپێویستی دەزانێت "پەرلەمان و سەرۆكایەتیەكەی بۆ پاراستنی شكۆی دەزگاكە خەم لە یاسای بودجە و بەنیشتیمانیكردنی هێزە چەكدارەكان بخۆن كە چەندین ساڵە دەسەڵات موهاتەراتی پێ دەكات، پێویستە پەرلەمان خەمی  لە پاراستنی شكۆی هەرێم بخواردایە لە ئاست سەركێشیەكانی حكومەتی هەرێم و بێباكی حكومەتی عێراق نەك جوڵاندنی سكاڵا لەسەر كلیپێك و سنورداركردنی مافی ئازادی رادەربڕین."