پارێزگاری هەولێر بەوەکالەت: ئه‌و تاوانبارانه‌ی‌ ته‌قه‌یان له‌چێشتخانه‌كه‌ كرد بەزوترینکات دەستگیر دەکرێن
  2021-01-15       1010       
پارێزگاری هەولێر بەوەکالەت ئەو چێشتخانەیەی بەسەرکردەوە کە به‌ره‌به‌یانی‌ ئەمڕۆ‌ هێرشیکرایە سەر، ناوبراو به‌ڵێنیدا كه‌ ئه‌و تاوانبارانه‌ی‌ ته‌قه‌یان له‌چێشتخانه‌كه‌ كردووه‌ بەزوترینکات دەستگیر دەکرێن.

ئاوێنه‌: دوای ئەوەی کاتژمێر 2:30 خولەکی بەرەبەیانی ئەمڕۆ هەینی، لەشاری هەولێر  چوار کەس بەهۆی نەمانی خواردن، بەچەکەوە هەڵیانکوتایە سەر سەروپێخانەو چێشتخانەی ساماڵ‌و چێشتخانەکەو چەند چێشتخانەیەکی تەنیشتیان دایە بەر دەستڕێژی گوللە، هێمن قادر، پارێزگاری هەولێر بەوەکالەت، بەیاوەری نەبەز عەبدولحەمید، قائمقامی ناوەند، شوێنی ڕوداوەکەی بەسەر کردەوە.

لەبەسەرکردنەوەکەیدا پارێزگاری هەولێر بەوەکالەت، دڵنیایی دایە خاوەنی چێشخانەکان و کرێکاران و سەرجەم ئەو کاسبکارانەی لەو شوێنەداکاردەکەن، کە تاوانباران و دەرچووان لەیاسا بەزوترینکات دەستگیر دەکرێن و ڕێکاری یاساییان لەبەرامبەردا دەگیرێتەبەر.

ڕاشیگەیاند، "وەک پارێزگای هەولێر بەهیچ شیوەیەک ڕێگە نادەین ئەو تاونبارانە لەدەست یاسا ڕزگاریان بێت کە بەم شێوەیە هەڵبکوتنە سەر ماڵ و موڵکی خەڵک و ئارامی و ئاسایشی شار بشوێنن و دەستدرێژی بکەنە سەر کاسبکاران، دڵنیابن هێزەکانمان لەئاسایش و پۆلیس دەستکراوەکردووە لەئیجرائات وەرگرتن و دەستگیرکردنی تاوانباران لەزووترین كاتدا، هەرچی بە ئێمەش بکرێت بۆ هاوکاری و پاڵپشتیتان وەک پارێزگای هەولێر ئامادەین".

به‌هۆی‌ دەستڕێژی گوللەی‌ چه‌كداره‌كانه‌وه‌ زەرەو زیانێکی ماددی‌ زۆر بەر چێشتخانەکەو دوو چێشتخانەی دیکەو چایخانەیەک كه‌وتووه‌.

زۆرترین بینراو
© 2021 Awene Online, Inc. All Rights Reserved.
×