سەرۆكی پەرلەمان: میدیای کڕدراو جێگەی بە میدیاكانی دیكە لێژكردوە
  2021-01-16       612       

رێواز فایەق، سەرۆكی پەرلەمانی كوردستان، رایگەیاند، ئەو پێشێلكارییانەی بەرامبەر بە رۆژنامەنوسان لە هەرێم ئەنجام دەدرێن بێ پاساون. دەشڵێت: لە هەرێمی كوردستان میدیای ئازاد لە پاشەكشەدایەو میدیای "كڕدراو" كە بە پارەی سیاسییەکان و پارەی گەندەڵی ئاڕاستە دەکرێت، جێگەی بە میدیاكانی دیكە لێژكردوە.

ئاوێنە: رێواز فایەق، سەرۆکی پەرلەمانی کوردستان، ئەمڕۆ شەممە، لەمیانی بەشداریکردنیدا لەدیداری "رەوشی ئازادی رۆژنامەنوسی لەهەرێمی کوردستانی عێراق 2020" کە لەلایەن سەنتەری میترۆ بۆ داکۆکی لەمافی رۆژنامەنوسان رێکخرابو، لە وتەیەكدا رایگەیاند، بەپێویستی دەزانن پارێزگاری لەئازادی کاری راگەیاندن بکرێت و ئەو پێشێلکاریانەی بەرامبەر بە رۆژنامەنوسان ئەنجام دەدرێن بێ پاساون.

سەرۆكی پەرلەمان وتی: لەئێستادا میدیا لەکوردستان بەسەر چەند ئاستێکدا دابەشبوە، لەوانەش میدیای فەرمی حزبەکان، ئەو میدیانەی بە ناڕاستەخۆ پشتیوانی دەکرێن لەگەڵ میدیای ئازاد، کە "بەداخەوە میدیای ئازاد بەراورد بە چوارساڵ پێش ئێستا لەپاشەکشەدایە و میدیای کڕدراو جێگەی بە میدیاکانی دیکە لێژکردوە."

ئاماژەی بەوەشکرد، "میدیای کڕدراو کە لەئێستادا میدیای زاڵە لەکوردستان هیچ کەس خۆی لێ ناکات بە خاوەنی و بەپارەی سیاسییەکان و گەندەڵی ئاڕاستە دەکرێت، بەجۆرێک کەسانی گەندەڵ بە جوان و کەسانی پاک وەک گەندەڵ پیشاندەدات."

سەرۆکی پەرلەمانی کوردستان ئەوەشی خستەڕو، لەئێستادا دەیان جۆر رێنمایی لەدامەزراوەکانی حکومەت دەردەچێت کە پێچەوانەی یاسا بەرکارەکانە، بۆیە پەرلەمانی کوردستان خواستی ئەوەی هەیە بەهاوکاری لەگەڵ رۆژنامەنوسان و ناوەندەکانی داکۆکیکردن لەرۆژنامەگەری جارێکی دیکە پیشنیارە "یاسای رێکخستنی میدیای ئەلیکترۆنی" بخاتەوە بەرباس ئەوەش بەئامانجی پڕکردنەوەی ئەو بۆشاییە یاساییەی هەیە كە دادگاکان لەکەیسی رۆژنامەنوساندا پەنادەبەنەبەر یاساکانی سزادانی عێراقی.

زۆرترین بینراو
© 2021 Awene Online, Inc. All Rights Reserved.
×