وەزارەتی تەندروستی عێراق رایگەیاند، لە ماوەی 24 سەعاتی رابردودا، نۆ توشبوی كۆرۆنا لە سەرتاسەری وڵات گیانیان لەدەستداوە كە سێیان لە هەرێمی كوردستان بون.

ئاوێنە: وەزارەتی تەندروستی عێراق، ئێوارەی ئەمڕۆ یەكشەممە، لە بەیاننامەیەكدا ئاشكرایكرد: لەماوەی 24 سەعاتی رابردودا، 36 هەزار و 483 پشكنینی كۆرۆنا لەسەرتاسەری وڵات ئەنجامدراون و بەپێی ئەنجامەكان 645 كەسی دیكە توشی كۆرۆنا بون.

بەپێی بەیاننامەكە هەر لەماوەی 24 سەعاتی رابردودا ژمارەی ئەو توشبوانەی لە ڤایرۆسەكە چاكبونەتەوە زیاتر بوە لەوانەی توشی كۆرۆنا بون بەشێوەیەك كە یەك هەزارو 531 توشبوی كۆرۆنا چاكبونەتەوە.

هەروەها ئاماژەی بەوەشداوە كە هەر لە ماوەی 24 سەعاتی رابردودا نۆ توشبوی ڤایرۆسەكە گیانیان لەدەستداوە كە سێیان لە هەرێمی كوردستان بون بەشێوەیەك دو حاڵەتی گیان لەدەستدان لە هەولێر و ئەویدیكەیان لە سلێمانی تۆماركراوە.

وەزارەتی تەندروستی عێراق لە بەیاننامەكەیدا هێمای بۆ ئەوە كردوە كە بە تۆماركردنی ئەم حاڵەتە نوێیانە، كۆی توشبون بە كۆرۆنا گەیشتۆتە 608 هەزار و 232 كەس و لەوانە 12 هەزارو 944 كەسیان گیانیان لەدەستداوەو 569 هەزارو 429 كەسیان چاكبونەتەوەو 25 هەزارو 859 كەسیشیان لەژێر چارەسەردان كە لەوانە 143 توشبویان لەژێر چاودێری چڕدان.