ئەمڕۆ دوشەممە، لانیكەم پێنج كۆڵبەری خەڵكی ورمێی رۆژهەڵاتی كوردستان لە بەرزاییەكانی نێوان رۆژهەڵات و باكوری كوردستان بون بەژێر هەرەسەی بەفرەوەو گیانیان لە دەستداو گەڕان و پشکنین بۆ دۆزینەوەی تەرمەکانیشیان بەردەوامە.

ئاوێنە: بەپێی راپۆرتێكی رێکخراوی مافی مرۆڤی هەنگاو، ئەمڕۆ دوشەممە لانیکەم پێنج کۆڵبەری خەڵکی ورمێ لە کاتی کۆڵبەری لە چیاکانی سنوری ئەو شارەی رۆژهەڵاتی كوردستان لەگەڵ باكوری كوردستان(توركیا)، بە هۆی هەرەسهێنانی بەفرەوە گیانیان لەدەست داوە.

ناوی ئەم پێنج کۆڵبەرە بریتییە لە: ئەولای خودایی، فوڕات خودایی، مەتین ئەسڵانی، بیلەن ئەحمەدی، یاوەر ئەسڵانی.

ئەو پێنج کۆڵبەرە سەرجەمیان خەڵکی گوندی کورانی سەر بە ورمێی رۆژهەڵاتی كوردستانن.

ئاماژەی بەوەشداوە كە ئەم پێنج کۆڵبەرە لە گوندی "دریشک" لە باکوری کوردستان توشی روداوی هەرەسی بەفر بون و هێزە چەکدارەکانی تورکیا ڕێگایان نەداوە خەڵکی گوندی کوران بە هانایانەوە بچن و تەرمەکانیان هێشتا نەدۆزراوەتەوە.