خڵوسی ئاكار، وەزیری بەرگری توركیا، كەمێك لەمەوبەر، لەڕێگەی فڕۆكەخانەی نێودەوڵەتی هەولێرەوە گەیشتە هەرێمی كوردستان و لەلایەن شۆڕش ئیسماعیل، وەزیری پێشمەرگەو ژمارەیەك لە بەرپرسانی دیكەی حكومەتی هەرێمی كوردستانەوە پێشوازی لێكرا.
ئاوێنە: سەردانی خڵوسی ئاكار بۆ هەرێمی كوردستان، دوای ئەوە دێت كە ئەمڕۆ دوشەممە، بە سەرۆكایەتی وەفدێكی باڵای وڵاتەكەی گەیشتە بەغداو لەگەڵ بەرپرسانی باڵای عێراق كۆبوەوە.
لە سەردانەكەیدا بۆ هەرێمی كوردستان بڕیارە وەزیری بەرگری توركیا لەگەڵ بەرپرسانی باڵای هەرێمی كوردستانیشدا كۆببێتەوە.
لەسەردانەكەیدا بۆ بەغدا، وەزیری بەرگری توركیا لەگەڵ مستەفا كازمی، سەرۆك وەزیرانی عێراق كۆبوەوەو نوسینگەی راگەیاندنی مستەفا كازمی لە بەیاننامەیەكدا ناوەڕۆكی كۆبونەوەكەی خستبوەڕو.
بەپێی بەیاننامەیەكە لە دیدارەكەدا، گفتوگۆ لەبارەی ئەو پرسانەی جێی گرنگی هەردولان لەگەڵ پتەوكردنی هاریكاریی نێوان هەردو وڵات و هەروەها رێزگرتن لە سەروەری عێراق كراوە.
لە دیدارەكەدا، سەرۆك وەزیرانی عێراق جەختی لەسەر پێویستی كاراكردنی ئەو رێككەوتنانە كردۆتەوە كە لەماوەی سەردانەكەی دواییدا بۆ ئەنكەرە ئەنجامدراون، وێڕای جەختكردنەوە لە گرنگی پابەندبونی توركیا بە جێبەجێكردنی بەڵێنەكانی لە بواری وەبەرهێناندا لەعێراق كە لە كۆنگرەی پشتیوانی عێراق لە كوەیت ئەو بەڵێنانەی داون.
هەروەها سەرۆك وەزیرانی عێراق دوپاتیكردۆتەوە كە وڵاتەی هەر هەڕەشەیەك یاخود "چالاكییەكی تیرۆریستی" لە خاكی عێراقەوە كە توركیا بكاتە ئامانج، رەتدەكاتەوە.
هەروەك كازمی ئاماژەی بە گرنگی هاریكاریی سەربازی نێوان هەردو وڵات داوەو وەزیری بەرگری توركیاش ئامادەیی سوپای وڵاتەكەی دەربڕیوە بۆ پشتیوانی و راوێژ لە بوارەكانی بەرەنگاربونەوەی تیرۆرو مەشق و مانۆڕی هاوبەشدا.
بەگوێرەی بەیاننامەكە هەردولا رێككەوتون لەسەر گرنگی چارەسەركردنی "هەڕەشە تیرۆریستییەكان" لەنزیك سنوری هاوبەشی هەردو وڵات و جەختیشیان كردۆتەوە كە "سەقامگیری" دەرگای هاریكاریی زیاتر لەنێوان بەغداو ئەنكەرە دەكاتەوە.