دۆناڵد ترەمپ، دوای جێهێشتنی كۆشكی سپی بۆ دوایین جار وەك سەرۆكی ئەمریكا، لەگەڵ ئەوەی هیوای سەركەوتنی بۆ ئیدارەی نوێی ئەمریكا بە سەرۆكایەتی جۆ بایدن خواست، رایگەیاند، جارێكی تر دەگەڕێینەوە كۆشكی سپی.

ئاوێنە: ئێوارەی ئەمڕۆ چوارشەممە، دۆناڵد ترەمپ، لەگەڵ هاوسەرەكەی، بۆ دوایین جار وەك چلوپێنجەمین سەرۆكی ئەمریكا، بە هەلیكۆپتەرێك كۆشی سپی بەرەو بنكەی ئاسمانی "ئەندرۆز" لە ماریلاند-ی نزیك واشنتۆنی پایتەخت بەجێهێشت كە لەوێ فڕۆكەیەكی سەربازیی ئەمریكا چاوەڕێی بو بۆ گواستنەوەی بۆ شوێنی نیشتەجێبونی خۆی لە فلۆریدا.

ترەمپ، بەر لە بەڕێكەوتنی بۆ فلۆریدا، لە بنكەی ئاسمانی "ئەندرۆز" لە وتەیەكدا بۆ لایەنگرانی رایگەیاند، ئیدارەكەی لەماوەی چوار ساڵی رابردودا زۆر ئامانجی بەدیهێناون.

ئاماژەی بەوەشدا كە 75 ملیۆن ئەمریكی دەنگیان بەو داوە لە دوایین هەڵبژاردنی سەرۆكایەتی و ئەوەشی بە جێی شانازی ناوبردو وتیشی"بەردەوام دەبم لە خەبات لە پێناو ئێوەدا."

هەروەها وتی، هیوای سەركەوتنی گەورە بۆ ئیدارەی نوێی ئەمریكا دەخوازم و وتیشی"جارێكی تر دەگەڕێینەوە" كۆشكی سپی.

ترەمپ بەر لە رێوڕەسمی دەستبەكاربونی جۆ بایدن، كۆشكی سپی جێهێشت، بەوەش دوای سەرۆك ئەندرۆ جۆنسۆن(1865-1869) دەبێتە یەكەم سەرۆكی ئەمریكا كە بەشداری رێوڕسەمی دەستبەكاربونی جێگرەوەكەی ناكات.