"15ی ئەم مانگە رەشنوسی بودجەی هەرێم دەگاتە ئەنجومەنی وەزیران"
  2021-02-10       300       

بەڵێن ئیسماعیل، ئه‌ندامی لیژنه‌ی دارایی په‌رله‌مانی کوردستان ئاشکرایكرد: بودجه‌ی ساڵی (2021)ی هەرێمی کوردستان به‌ (14) ترلیۆن دینار خه‌مڵێنراوه‌و رۆژی 15ی ئەم مانگە دەگاتە ئەنجومەنی وەزیرانی هەرێم.

ئاوێنە: به‌ڵێن ئیسماعیل، ئه‌ندامی لیژنه‌ی دارایی لە په‌رله‌مانی كوردستان بە میدیای رەسمی گۆڕانی رایگه‌یاند: بودجه‌ی ساڵی (2021) به‌ (14) ترلیۆن دینار خه‌مڵێنراوه‌و کورتهێنانی دەبێت، به‌ڵام هه‌وڵ ده‌ده‌رێت به‌ رێككه‌وتن له‌گه‌ڵ و به‌غداو چاكسازی له‌ سه‌رچاوه‌كانی داهات له‌ هه‌رێمی كوردستان پڕبكرێته‌وه‌، ئه‌گه‌ر چاكسازی بكرێت ده‌توانرێت له‌كاتی خۆیدا موچه‌ دابه‌شبكرێت و پڕۆژه‌كانیش ده‌كه‌ونەوە‌ كار.

وتیشی"بۆئه‌وه‌ی حكومه‌تێكی شه‌فاف و په‌رله‌مانێكی كارا هه‌بێت و بتوانێت چاودێری حكومه‌ت بكات، پێویست ده‌كات پڕۆژه‌ یاسای بودجه‌ هه‌بێت، پڕۆژه‌ یاساكه‌ له‌وه‌زاره‌تی دارایی ته‌واو بوه‌و ته‌نها ژماره‌و داتاكانی وه‌زاره‌تی سامانه‌ سروشتیه‌كان ماوه‌، له‌ (15)ی ئەم مانگە ده‌چێته‌ ئه‌نجومه‌نی وه‌زیران و لیژنه‌ی یاسایی له‌ماوه‌یه‌كی كه‌مدا پێداچونه‌وه‌ی پێداده‌كه‌ن و دوای په‌سه‌ندكردنی، ره‌وانه‌ی په‌رله‌مانی كوردستان ده‌كرێت."

بەڵێن ئیسماعیل ئەوەی خستەڕو: له ‌پرۆژه‌ یاسای بودجه‌ی ساڵی (2021) حكومه‌تی هه‌رێمی كوردستان جه‌ختی له‌ پابه‌ندبون به‌ رێككه‌وتنه‌كه‌ی نێوان هه‌رێم و به‌غدا كردوه‌ته‌وه‌و وتیشی"پێویسته‌ كورد هه‌میشه‌ چاوی له‌ به‌غدا نه‌بێت، به‌ڵكو هه‌نگاوه‌كانی بۆ چاكسازی له‌ناوخۆدا له‌ كه‌رتی نه‌وت و پێداچونه‌وه‌ به‌گرێبه‌سته‌كان و خاڵه‌ سنورییه‌كان و رێوشێنه‌كانی كۆكردنه‌وه‌ی داهات بنێت، بۆ ئه‌وه‌ی بتوانێت ئه‌و داهاته‌ زۆره‌ی له‌ كوردستان هه‌یه‌ به‌باشی كۆبكرێته‌وه‌‌و بخرێته‌ خه‌زێنه‌ی وه‌زاره‌تی داراییەوە."

زۆرترین بینراو
© 2021 Awene Online, Inc. All Rights Reserved.
×