بەپێی بەیاننامەی ئەمڕۆی وەزارەتی تەندروستی عێراق، ژمارەی توشبون و مردن بە كۆرۆنا لە عێراق زیاتر هەڵكشاوە بەشێوەیەك لەماوەی 24 سەعاتی رابردودا سێ هەزارو 896 حاڵەتی نوێی توشبون و 16 حاڵەتی گیانلەدەستدان تۆماركراون.

ئاوێنە: وەزارەتی تەندروستی عێراق، ئێوارەی ئەمڕۆ پێنجشەممە، لە بەیاننامەیەكدا ئاشكرایكرد: لەماوەی 24 سەعاتی رابردودا، 53 هەزارو 21 پشكنینی كۆرۆنا لەسەرتاسەری وڵات ئەنجامدراون و بەپێی ئەنجامەكان سێ هەزارو 896 كەسی دیكە توشی كۆرۆنا بون.

بەپێی بەیاننامەكە هەر لەماوەی 24 سەعاتی رابردودا ژمارەی ئەو توشبوانەی لە ڤایرۆسەكە چاكبونەتەوە كەمتربون لەوانەی توشی كۆرۆنا بون بەشێوەیەك كە یەك هەزارو 691 توشبوی كۆرۆنا چاكبونەتەوە.

هەروەها ئاماژەی بەوەشداوە كە هەر لە ماوەی 24 سەعاتی رابردودا 16 توشبوی ڤایرۆسەكە گیانیان لەدەستداوە كە یەكێكیان لە پارێزگای هەولێر و یەكێكیشیان لە پارێزگای دهۆك بوە.

ماوەی چەند رۆژێكە تۆماری رۆژانەی توشبون و گیانلەدەستدان بە كۆرۆنا لە عێراق روی لە هەڵكشانەو رۆژی دوشەممەش وەزیری تەندروستی عێراق تۆماركردنی چەند حاڵەتێكی توشبون بە كۆرۆنای گۆڕاوی ئاشكراكرد. لیژنەی باڵای تەندروستی و سەلامەتی نیشتمانی عێراقیش چەند بڕیارێكی نوێی بۆ توندكردنەوەی رێكارەكانی روبەڕوبونەوەی كۆرۆنا راگەیاندون.

وەزارەتی تەندروستی عێراق لە بەیاننامەكەیدا هێمای بۆ ئەوە كردوە كە بە تۆماركردنی ئەم حاڵەتە نوێیانە، كۆی توشبون بە كۆرۆنا گەیشتۆتە 657 هەزار و 453 كەس و لەوانە 13 هەزارو 220 كەسیان گیانیان لەدەستداوەو 612 هەزارو 727 كەسیان چاكبونەتەوەو 31 هەزارو 506 كەسیشیان لەژێر چارەسەردان كە لەوانە 302 توشبویان لەژێر چاودێری چڕدان.