نوسینگەكەی: فواد مەعسوم دژی لێدوانەكانی "شیرین"ی كچیەتی
  2021-02-22       1310       

نوسینگەی فواد مەعسوم، ئەندامی دەستەی دامەزرێنەری یەكێتی دەڵێت، ماوەیەك بەهۆی لێدوانەكانی شیرین فواد مەعوسمی كچیەوە، بەناڕەوا هێرشێكی نامەنتیقی دەكرێتە سەر فواد مەعسوم لەكاتێكدا ناوبراو دژی ئەو جۆرە بۆچونانەی كچەكەیەتی.

ئاوێنە: نوسینگەی فواد مەعسوم، سەرۆك كۆماری پێشوی عێراق، لە رونكردنەوەیەكدا وتی، ماوەیەکە بەڕەواو ناڕەوا هێرشێکی نامەنتیقی دەکرێتە سەر د.فوئاد مەعسوم، ئەندامی دەستەی دامەزرێنەری یەکێتی نیشتیمانی کوردستان، بەهۆی لێدوانی شیرین فوئاد مەعسومی کچییەوە.

هەروەها ئەوەشی خستۆتەڕو"بەهەمو لایەکی رادەگەیەنین کە جەنابی د.فوئاد مەعسوم نەک هەر لەگەڵ ئەو جۆرە لێدوان و قسانە نییەو دورە لە بۆچون و ڕاو کەسایەتی جەنابیان، زۆربەی کاتیش دژو ناهاوڕابوە لەگەڵ ئەو جۆرە بۆچونانە کە بەداخەوە بەشێک لە راگەیاندنەکانیش بەمەبەست و بۆ ناشیرینکردنی خەباتی پاک و نەزیهی جەنابی د.فوئاد تەرویجی ئەو مەسەلانە دەکەن."

هەروەها نوسینگەی فواد مەعسوم جارێكی دیكە ئەوەشی رەتكردۆتەوە كە شیرین فواد مەعسوم هیچ پۆستێكی لە ماوەی سەرۆكایەتی كۆماری باوكیدا و نە پێشترو نە دواتریش لە هیچ جومگەیەكی نزیكی باوكییەوە هەبوبێت.

لەبەشێكی دیكەی رونكردنەوەكەدا هاتوە كە فواد مەعسوم "زۆر هەوڵیشیداوە کە بۆچون و روئیایەکانی (شیرین) واقعی بن و واز لەو جۆرە لێدوانانە بهێنێت کە بەهیچ شێوەیەک لەگەڵ دونیابینی بەڕێزیان یەکناگرێتەوە، بەڵام ئەو خاتونە لەتەمەنێکدا نییە کە ئاڕاستە بکرێت و خۆی ئازادە لە چ حزبێکدا کاردەکات و چی دەڵێت."

شیرین فواد مەعسوم لە نوێترین لێدوانیدا بۆ میدیاكانی پارتی لەبارەی سزادانی دەستگیركراوانی بادینانەوە رایگەیاندبو"کاری ڕۆژنامه‌نوس نییە سیخوڕى بکات و زانیاری لەبارەی شوێنى هه‌ستیار به‌ دوژمن بدات و كار بۆ لایه‌نى ده‌ره‌كى بکات."

شیرین فواد مەعسوم وتبوشی"هەوڵدان بۆ ده‌ستكاریکردنی بڕیارى دادگاكان، ڕێخۆشكه‌ر دەبێت بۆ ئه‌وه‌ى سیخوڕ و ئه‌وانه‌ى وڵات ده‌فرۆشن ئازاد بكرێن، ئه‌وه‌ش مه‌ترسى ده‌خاته‌ سه‌ر دۆخى ئه‌منى وڵاته‌كه‌ و ئەمنی نەتەوەیی."

كچەكەی فواد مەعسوم جەختی كردبوەوە كە "هه‌ر بڕیارێك بدرێت بۆ ئه‌وه‌ى ئه‌و به‌ناو ڕۆژنامه‌نوسانه‌ به‌ فشار ئازاد بکرێن، ئه‌وا پشتگیریکردنی کاری تێکدانە، لە داهاتو سیخوڕی ده‌بێت بە شانازی، ئەگەر فشارەکەش لە دەرەوە بێت، ئەوا مەبەست تەنیا تێکشکاندنی هەیبەتی دامودەزگای کوردستانە."

دەقی رونكردنەوەكە...

رونکردنەوەیەک لە نوسینگەی د.فوئاد مەعسوم ەوە

ماوەیەکە بەرەواو نارەوا هێرشێکی نامەنتیق دەکرێتە سەر جەنابی د.فوئاد مەعسوم ئەندامی دەستەی دامەزرێنەری یەکێتی نیشتیمانی کوردستان و سەرکردەی رۆژانی خەباتی شاروشاخ و ماندوبونی بەڕێزیان، بەهۆی لێدوانی خاتو شیرین فوئاد مەعسومی کچی بەڕێزیانەوە.

بەهەمولایەکی رادەگەیەنین کە جەنابی د.فوئاد مەعسوم نەک هەر لەگەڵ ئەو جۆرە لێدوان و قسانە نییەو دورە لە بۆچون و ڕاو کەسایەتی جەنابیان، زۆربەی کاتیش دژو ناهاوڕابوە لەگەڵ ئەو جۆرە بۆچونانە کە بەداخەوە بەشێک لە راگەیاندنەکانیش بەمەبەست و بۆ ناشیرینکردنی خەباتی پاک و نەزیهی جەنابی د.فوئاد تەرویجی ئەو مەسەلانە دەکەن.

لێرەوە بۆ چەندەمین جاریش بەهەمو لایەکی رادەگەیەنینەوە کە شیرین خانی کچی بەڕێز د.فوئاد مەعسوم هەرگیز هیچ پۆستێکی لە ماوەی سەرۆکایەتی کۆمارو نە پێشترو نەدواتر لە هیچ جومگەیەکی نزیکی باوکیەوە نەبوەو ئەو قسانە هەموی دورن لەراستیەوە کە گوایە لەسەرۆکایەتی کۆمار پۆستی هەبوە، شیرین خانیش وەک هەر کەسێکی تر ئازادە هەڵگری چ بیروباوەڕێک و چ ئایدیایەکەو ئەوەش لەهەمو دنیا شتێکی ئاسایی و یاساییە، جەنابی دکتۆر فوئاد چەندین جاریش ئەوەی دوپاتکردۆتەوە کە کچەکەی بەڕێزیان لەتەمەنێکی گەورەدایەو خاوەنی ماڵ و هاوسەری خۆیەتی و لەوڵاتێکی تر دەژیت و جەنابیان زۆر هەوڵیشیداوە کە بۆچون و روئیایەکانی واقعی بن و واز لەو جۆرە لێدوانانە بهێنێت کە بەهیچ شێوەیەک لەگەڵ دونیابینی بەڕێزیان یەکناگرێتەوە، بەڵام ئەو خاتونە لەتەمەنێکدا نییە کە ئاڕاستە بکرێت و خۆی ئازادە لە چ حزبێکدا کاردەکات و چی دەڵێت.

هیوادارین خەبات و ماندوبونی جەنابی د.فوئاد نەکرێتە دەستەچیلەی گڕبەردانی ناحەزانەی هیچ کەس و لایەنێک هەتا نزیکترین کەسیش بن لەبەڕێزیانەوە ، ئەم رونکردنەوەیەمان بەپێویست زانی بۆ بەرچاو رونی هەمولایەک .

نوسینگەی د.فوئاد مەعسوم
ئەندامی دەستەی دامەزرێنەری یەکێتی نیشتیمانی کوردستان و سەرۆک کۆماری پێشوی عیراق
21ی شوباتی 2021

زۆرترین بینراو
© 2021 Awene Online, Inc. All Rights Reserved.
×